Ἐν ἐξόδῳ Ισραηλ ἐξ Αἰγύπτου,

οἴκου Ιακωβ ἐκ λαοῦ βαρβάρου

₂ἐγενήθη Ιουδαία ἁγίασμα αὐτοῦ,

Ισραηλ ἐξουσία αὐτοῦ.

₃ἡ θάλασσα εἶδεν καὶ ἔφυγεν,

ὁ Ιορδάνης ἐστράφη εἰς τὰ ὀπίσω·

₄τὰ ὄρη ἐσκίρτησαν ὡσεὶ κριοὶ

καὶ οἱ βουνοὶ ὡς ἀρνία προβάτων.

₅τί σοί ἐστιν, θάλασσα, ὅτι ἔφυγες,

καὶ σοί, Ιορδάνη, ὅτι ἀνεχώρησας εἰς τὰ ὀπίσω;

₆τὰ ὄρη, ὅτι ἐσκιρτήσατε ὡσεὶ κριοί,

καὶ οἱ βουνοὶ ὡς ἀρνία προβάτων;

₇ἀπὸ προσώπου κυρίου ἐσαλεύθη ἡ γῆ,

ἀπὸ προσώπου τοῦ θεοῦ Ιακωβ

₈τοῦ στρέψαντος τὴν πέτραν εἰς λίμνας ὑδάτων

καὶ τὴν ἀκρότομον εἰς πηγὰς ὑδάτων.

₉μὴ ἡμῖν, κύριε, μὴ ἡμῖν,

ἀλλ᾽ ἢ τῷ ὀνόματί σου δὸς δόξαν

ἐπὶ τῷ ἐλέει σου καὶ τῇ ἀληθείᾳ σου,

₁₀μήποτε εἴπωσιν τὰ ἔθνη

Ποῦ ἐστιν ὁ θεὸς αὐτῶν;

₁₁ὁ δὲ θεὸς ἡμῶν ἐν τῷ οὐρανῷ ἄνω·

ἐν τοῖς οὐρανοῖς καὶ ἐν τῇ γῇ

πάντα, ὅσα ἠθέλησεν, ἐποίησεν.

₁₂τὰ εἴδωλα τῶν ἐθνῶν ἀργύριον καὶ χρυσίον,

ἔργα χειρῶν ἀνθρώπων·

₁₃στόμα ἔχουσιν καὶ οὐ λαλήσουσιν,

ὀφθαλμοὺς ἔχουσιν καὶ οὐκ ὄψονται,

₁₄ὦτα ἔχουσιν καὶ οὐκ ἀκούσονται,

ῥῖνας ἔχουσιν καὶ οὐκ ὀσφρανθήσονται,

₁₅χεῖρας ἔχουσιν καὶ οὐ ψηλαφήσουσιν,

πόδας ἔχουσιν καὶ οὐ περιπατήσουσιν,

οὐ φωνήσουσιν ἐν τῷ λάρυγγι αὐτῶν.

₁₆ὅμοιοι αὐτοῖς γένοιντο οἱ ποιοῦντες αὐτὰ

καὶ πάντες οἱ πεποιθότες ἐπ᾽ αὐτοῖς.

₁₇οἶκος Ισραηλ ἤλπισεν ἐπὶ κύριον·

βοηθὸς αὐτῶν καὶ ὑπερασπιστὴς αὐτῶν ἐστιν.

₁₈οἶκος Ααρων ἤλπισεν ἐπὶ κύριον·

βοηθὸς αὐτῶν καὶ ὑπερασπιστὴς αὐτῶν ἐστιν.

₁₉οἱ φοβούμενοι τὸν κύριον ἤλπισαν ἐπὶ κύριον·

βοηθὸς αὐτῶν καὶ ὑπερασπιστὴς αὐτῶν ἐστιν.

₂₀κύριος ἐμνήσθη ἡμῶν καὶ εὐλόγησεν ἡμᾶς,

εὐλόγησεν τὸν οἶκον Ισραηλ,

εὐλόγησεν τὸν οἶκον Ααρων,

₂₁εὐλόγησεν τοὺς φοβουμένους τὸν κύριον,

τοὺς μικροὺς μετὰ τῶν μεγάλων.

₂₂προσθείη κύριος ἐφ᾽ ὑμᾶς,

ἐφ᾽ ὑμᾶς καὶ ἐπὶ τοὺς υἱοὺς ὑμῶν·

₂₃εὐλογημένοι ὑμεῖς τῷ κυρίῳ

τῷ ποιήσαντι τὸν οὐρανὸν καὶ τὴν γῆν.

₂₄ὁ οὐρανὸς τοῦ οὐρανοῦ τῷ κυρίῳ,

τὴν δὲ γῆν ἔδωκεν τοῖς υἱοῖς τῶν ἀνθρώπων.

₂₅οὐχ οἱ νεκροὶ αἰνέσουσίν σε, κύριε,

οὐδὲ πάντες οἱ καταβαίνοντες εἰς ᾅδου,

₂₆ἀλλ᾽ ἡμεῖς οἱ ζῶντες εὐλογήσομεν τὸν κύριον

ἀπὸ τοῦ νῦν καὶ ἕως τοῦ αἰῶνος.