Αἰνεῖτε τὸ ὄνομα κυρίου, αἰνεῖτε, δοῦλοι, κύριον,

₂οἱ ἑστῶτες ἐν οἴκῳ κυρίου,

ἐν αὐλαῖς οἴκου θεοῦ ἡμῶν.

₃αἰνεῖτε τὸν κύριον, ὅτι ἀγαθὸς κύριος·

ψάλατε τῷ ὀνόματι αὐτοῦ, ὅτι καλόν·

₄ὅτι τὸν Ιακωβ ἐξελέξατο ἑαυτῷ ὁ κύριος,

Ισραηλ εἰς περιουσιασμὸν αὐτοῦ.

₅ὅτι ἐγὼ ἔγνων ὅτι μέγας κύριος

καὶ ὁ κύριος ἡμῶν παρὰ πάντας τοὺς θεούς·

₆πάντα, ὅσα ἠθέλησεν ὁ κύριος, ἐποίησεν

ἐν τῷ οὐρανῷ καὶ ἐν τῇ γῇ,

ἐν ταῖς θαλάσσαις καὶ ἐν πάσαις ταῖς ἀβύσσοις·

₇ἀνάγων νεφέλας ἐξ ἐσχάτου τῆς γῆς,

ἀστραπὰς εἰς ὑετὸν ἐποίησεν·

ὁ ἐξάγων ἀνέμους ἐκ θησαυρῶν αὐτοῦ.

₈ὃς ἐπάταξεν τὰ πρωτότοκα Αἰγύπτου

ἀπὸ ἀνθρώπου ἕως κτήνους·

₉ἐξαπέστειλεν σημεῖα καὶ τέρατα ἐν μέσῳ σου, Αἴγυπτε,

ἐν Φαραω καὶ ἐν πᾶσι τοῖς δούλοις αὐτοῦ.

₁₀ὃς ἐπάταξεν ἔθνη πολλὰ

καὶ ἀπέκτεινεν βασιλεῖς κραταιούς,

₁₁τὸν Σηων βασιλέα τῶν Αμορραίων

καὶ τὸν Ωγ βασιλέα τῆς Βασαν

καὶ πάσας τὰς βασιλείας Χανααν,

₁₂καὶ ἔδωκεν τὴν γῆν αὐτῶν κληρονομίαν,

κληρονομίαν Ισραηλ λαῷ αὐτοῦ.

₁₃κύριε, τὸ ὄνομά σου εἰς τὸν αἰῶνα

κύριε, τὸ μνημόσυνόν σου εἰς γενεὰν καὶ γενεάν.

₁₄ὅτι κρινεῖ κύριος τὸν λαὸν αὐτοῦ

καὶ ἐπὶ τοῖς δούλοις αὐτοῦ παρακληθήσεται.

₁₅τὰ εἴδωλα τῶν ἐθνῶν ἀργύριον καὶ χρυσίον,

ἔργα χειρῶν ἀνθρώπων·

₁₆στόμα ἔχουσιν καὶ οὐ λαλήσουσιν,

ὀφθαλμοὺς ἔχουσιν καὶ οὐκ ὄψονται,

₁₇ὦτα ἔχουσιν καὶ οὐκ ἐνωτισθήσονται,

ῥῖνας ἔχουσιν καὶ οὐκ ὀσφρανθήσονται,

χεῖρας ἔχουσιν καὶ οὐ ψηλαφήσουσιν,

πόδας ἔχουσιν καὶ οὐ περιπατήσουσιν,

οὐ φωνήσουσιν ἐν τῷ λάρυγγι αὐτῶν,

οὐδὲ γάρ ἐστιν πνεῦμα ἐν τῷ στόματι αὐτῶν.

₁₈ὅμοιοι αὐτοῖς γένοιντο οἱ ποιοῦντες αὐτὰ

καὶ πάντες οἱ πεποιθότες ἐπ᾽ αὐτοῖς.

₁₉οἶκος Ισραηλ, εὐλογήσατε τὸν κύριον·

οἶκος Ααρων, εὐλογήσατε τὸν κύριον·

₂₀οἶκος Λευι, εὐλογήσατε τὸν κύριον·

οἱ φοβούμενοι τὸν κύριον, εὐλογήσατε τὸν κύριον.

₂₁εὐλογητὸς κύριος ἐκ Σιων

ὁ κατοικῶν Ιερουσαλημ.