Αἰνεῖτε τὸν κύριον, ὅτι ἀγαθὸν ψαλμός·

τῷ θεῷ ἡμῶν ἡδυνθείη αἴνεσις.

₂οἰκοδομῶν Ιερουσαλημ ὁ κύριος

καὶ τὰς διασπορὰς τοῦ Ισραηλ ἐπισυνάξει,

₃ὁ ἰώμενος τοὺς συντετριμμένους τὴν καρδίαν

καὶ δεσμεύων τὰ συντρίμματα αὐτῶν,

₄ὁ ἀριθμῶν πλήθη ἄστρων,

καὶ πᾶσιν αὐτοῖς ὀνόματα καλῶν.

₅μέγας ὁ κύριος ἡμῶν, καὶ μεγάλη ἡ ἰσχὺς αὐτοῦ,

καὶ τῆς συνέσεως αὐτοῦ οὐκ ἔστιν ἀριθμός.

₆ἀναλαμβάνων πραεῖς ὁ κύριος,

ταπεινῶν δὲ ἁμαρτωλοὺς ἕως τῆς γῆς.

₇ἐξάρξατε τῷ κυρίῳ ἐν ἐξομολογήσει,

ψάλατε τῷ θεῷ ἡμῶν ἐν κιθάρᾳ,

₈τῷ περιβάλλοντι τὸν οὐρανὸν ἐν νεφέλαις,

τῷ ἑτοιμάζοντι τῇ γῇ ὑετόν,

τῷ ἐξανατέλλοντι ἐν ὄρεσι χόρτον

καὶ χλόην τῇ δουλείᾳ τῶν ἀνθρώπων,

₉διδόντι τοῖς κτήνεσι τροφὴν αὐτῶν

καὶ τοῖς νεοσσοῖς τῶν κοράκων τοῖς ἐπικαλουμένοις αὐτόν.

₁₀οὐκ ἐν τῇ δυναστείᾳ τοῦ ἵππου θελήσει

οὐδὲ ἐν ταῖς κνήμαις τοῦ ἀνδρὸς εὐδοκεῖ·

₁₁εὐδοκεῖ κύριος ἐν τοῖς φοβουμένοις αὐτὸν

καὶ ἐν τοῖς ἐλπίζουσιν ἐπὶ τὸ ἔλεος αὐτοῦ.