Αἰνεῖτε τὸν κύριον ἐκ τῶν οὐρανῶν,

αἰνεῖτε αὐτὸν ἐν τοῖς ὑψίστοις.

₂αἰνεῖτε αὐτόν, πάντες οἱ ἄγγελοι αὐτοῦ·

αἰνεῖτε αὐτόν, πᾶσαι αἱ δυνάμεις αὐτοῦ.

₃αἰνεῖτε αὐτόν, ἥλιος καὶ σελήνη·

αἰνεῖτε αὐτόν, πάντα τὰ ἄστρα καὶ τὸ φῶς.

₄αἰνεῖτε αὐτόν, οἱ οὐρανοὶ τῶν οὐρανῶν

καὶ τὸ ὕδωρ τὸ ὑπεράνω τῶν οὐρανῶν.

₅αἰνεσάτωσαν τὸ ὄνομα κυρίου,

ὅτι αὐτὸς εἶπεν, καὶ ἐγενήθησαν,

αὐτὸς ἐνετείλατο, καὶ ἐκτίσθησαν.

₆ἔστησεν αὐτὰ εἰς τὸν αἰῶνα καὶ εἰς τὸν αἰῶνα τοῦ αἰῶνος·

πρόσταγμα ἔθετο, καὶ οὐ παρελεύσεται.

₇αἰνεῖτε τὸν κύριον ἐκ τῆς γῆς,

δράκοντες καὶ πᾶσαι ἄβυσσοι·

₈πῦρ, χάλαζα, χιών, κρύσταλλος,

πνεῦμα καταιγίδος, τὰ ποιοῦντα τὸν λόγον αὐτοῦ·

₉τὰ ὄρη καὶ πάντες οἱ βουνοί,

ξύλα καρποφόρα καὶ πᾶσαι κέδροι·

₁₀τὰ θηρία καὶ πάντα τὰ κτήνη,

ἑρπετὰ καὶ πετεινὰ πτερωτά·

₁₁βασιλεῖς τῆς γῆς καὶ πάντες λαοί,

ἄρχοντες καὶ πάντες κριταὶ γῆς·

₁₂νεανίσκοι καὶ παρθένοι,

πρεσβῦται μετὰ νεωτέρων·

₁₃αἰνεσάτωσαν τὸ ὄνομα κυρίου,

ὅτι ὑψώθη τὸ ὄνομα αὐτοῦ μόνου·

ἡ ἐξομολόγησις αὐτοῦ ἐπὶ γῆς καὶ οὐρανοῦ.

₁₄καὶ ὑψώσει κέρας λαοῦ αὐτοῦ·

ὕμνος πᾶσι τοῖς ὁσίοις αὐτοῦ,

τοῖς υἱοῖς Ισραηλ, λαῷ ἐγγίζοντι αὐτῷ.