₂Ὁ θεός, τίς ὁμοιωθήσεταί σοι;

μὴ σιγήσῃς μηδὲ καταπραΰνῃς, ὁ θεός·

₃ὅτι ἰδοὺ οἱ ἐχθροί σου ἤχησαν,

καὶ οἱ μισοῦντές σε ἦραν κεφαλήν,

₄ἐπὶ τὸν λαόν σου κατεπανουργεύσαντο γνώμην

καὶ ἐβουλεύσαντο κατὰ τῶν ἁγίων σου·

₅εἶπαν Δεῦτε καὶ ἐξολεθρεύσωμεν αὐτοὺς ἐξ ἔθνους,

καὶ οὐ μὴ μνησθῇ τὸ ὄνομα Ισραηλ ἔτι.

₆ὅτι ἐβουλεύσαντο ἐν ὁμονοίᾳ ἐπὶ τὸ αὐτό,

κατὰ σοῦ διαθήκην διέθεντο

₇τὰ σκηνώματα τῶν Ιδουμαίων καὶ οἱ Ισμαηλῖται,

Μωαβ καὶ οἱ Αγαρηνοί,

₈Γεβαλ καὶ Αμμων καὶ Αμαληκ

καὶ ἀλλόφυλοι μετὰ τῶν κατοικούντων Τύρον·

₉καὶ γὰρ καὶ Ασσουρ συμπαρεγένετο μετ᾽ αὐτῶν,

ἐγενήθησαν εἰς ἀντίλημψιν τοῖς υἱοῖς Λωτ.

διάψαλμα.

₁₀ποίησον αὐτοῖς ὡς τῇ Μαδιαμ καὶ τῷ Σισαρα,

ὡς ὁ Ιαβιν ἐν τῷ χειμάρρῳ Κισων·

₁₁ἐξωλεθρεύθησαν ἐν Αενδωρ,

ἐγενήθησαν ὡσεὶ κόπρος τῇ γῇ.

₁₂θοῦ τοὺς ἄρχοντας αὐτῶν ὡς τὸν Ωρηβ καὶ Ζηβ

καὶ Ζεβεε καὶ Σαλμανα πάντας τοὺς ἄρχοντας αὐτῶν,

₁₃οἵτινες εἶπαν Κληρονομήσωμεν ἑαυτοῖς τὸ ἁγιαστήριον τοῦ θεοῦ.

₁₄ὁ θεός μου, θοῦ αὐτοὺς ὡς τροχόν,

ὡς καλάμην κατὰ πρόσωπον ἀνέμου·

₁₅ὡσεὶ πῦρ, ὃ διαφλέξει δρυμόν,

ὡς εἰ φλὸξ κατακαύσαι ὄρη,

₁₆οὕτως καταδιώξεις αὐτοὺς ἐν τῇ καταιγίδι σου

καὶ ἐν τῇ ὀργῇ σου ταράξεις αὐτούς.

₁₇πλήρωσον τὰ πρόσωπα αὐτῶν ἀτιμίας,

καὶ ζητήσουσιν τὸ ὄνομά σου, κύριε.

₁₈αἰσχυνθήτωσαν καὶ ταραχθήτωσαν εἰς τὸν αἰῶνα τοῦ αἰῶνος

καὶ ἐντραπήτωσαν καὶ ἀπολέσθωσαν

₁₉καὶ γνώτωσαν ὅτι ὄνομά σοι κύριος,

σὺ μόνος ὕψιστος ἐπὶ πᾶσαν τὴν γῆν.