Ὁ κύριος ἐβασίλευσεν, ἀγαλλιάσθω ἡ γῆ,

εὐφρανθήτωσαν νῆσοι πολλαί.

₂νεφέλη καὶ γνόφος κύκλῳ αὐτοῦ,

δικαιοσύνη καὶ κρίμα κατόρθωσις τοῦ θρόνου αὐτοῦ.

₃πῦρ ἐναντίον αὐτοῦ προπορεύσεται

καὶ φλογιεῖ κύκλῳ τοὺς ἐχθροὺς αὐτοῦ·

₄ἔφαναν αἱ ἀστραπαὶ αὐτοῦ τῇ οἰκουμένῃ,

εἶδεν καὶ ἐσαλεύθη ἡ γῆ.

₅τὰ ὄρη ἐτάκησαν ὡσεὶ κηρὸς ἀπὸ προσώπου κυρίου,

ἀπὸ προσώπου κυρίου πάσης τῆς γῆς.

₆ἀνήγγειλαν οἱ οὐρανοὶ τὴν δικαιοσύνην αὐτοῦ,

καὶ εἴδοσαν πάντες οἱ λαοὶ τὴν δόξαν αὐτοῦ.

₇αἰσχυνθήτωσαν πάντες οἱ προσκυνοῦντες τοῖς γλυπτοῖς

οἱ ἐγκαυχώμενοι ἐν τοῖς εἰδώλοις αὐτῶν·

προσκυνήσατε αὐτῷ, πάντες οἱ ἄγγελοι αὐτοῦ.

₈ἤκουσεν καὶ εὐφράνθη Σιων,

καὶ ἠγαλλιάσαντο αἱ θυγατέρες τῆς Ιουδαίας

ἕνεκεν τῶν κριμάτων σου, κύριε·

₉ὅτι σὺ εἶ κύριος ὁ ὕψιστος ἐπὶ πᾶσαν τὴν γῆν,

σφόδρα ὑπερυψώθης ὑπὲρ πάντας τοὺς θεούς.

₁₀οἱ ἀγαπῶντες τὸν κύριον, μισεῖτε πονηρόν·

φυλάσσει κύριος τὰς ψυχὰς τῶν ὁσίων αὐτοῦ,

ἐκ χειρὸς ἁμαρτωλῶν ῥύσεται αὐτούς.

₁₁φῶς ἀνέτειλεν τῷ δικαίῳ

καὶ τοῖς εὐθέσι τῇ καρδίᾳ εὐφροσύνη.

₁₂εὐφράνθητε, δίκαιοι, ἐπὶ τῷ κυρίῳ

καὶ ἐξομολογεῖσθε τῇ μνήμῃ τῆς ἁγιωσύνης αὐτοῦ.