AD TIMOTHEUM I 2

₁obsecro igitur primo omnium fieri obsecrationes

orationes postulationes gratiarum actiones pro omnibus hominibus

₂pro regibus et omnibus qui in sublimitate sunt

ut quietam et tranquillam vitam agamus in omni pietate et castitate

₃hoc enim bonum est et acceptum

coram salutari nostro Deo

₄qui omnes homines vult salvos fieri et ad agnitionem veritatis venire

₅unus enim Deus

unus et mediator Dei et hominum homo Christus Iesus

₆qui dedit redemptionem semet ipsum pro omnibus

testimonium temporibus suis

₇in quo positus sum ego praedicator et apostolus

veritatem dico non mentior

doctor gentium in fide et veritate

₈volo ergo viros orare in omni loco

levantes puras manus sine ira et disceptatione

₉similiter et mulieres in habitu ornato cum verecundia et sobrietate

ornantes se non in tortis crinibus

aut auro aut margaritis vel veste pretiosa

₁₀sed quod decet mulieres promittentes pietatem per opera bona

₁₁mulier in silentio discat cum omni subiectione

₁₂docere autem mulieri non permitto neque dominari in virum

sed esse in silentio

₁₃Adam enim primus formatus est deinde Eva

₁₄et Adam non est seductus

mulier autem seducta in praevaricatione fuit

₁₅salvabitur autem per filiorum generationem

si permanserint in fide et dilectione

et sanctificatione cum sobrietate