LIBER NUMERORUM 5

₁locutusque est Dominus ad Mosen dicens

₂praecipe filiis Israhel ut eiciant de castris

omnem leprosum et qui semine fluit pollutusque est super mortuo

₃tam masculum quam feminam eicite de castris

ne contaminent ea cum habitaverim

vobiscum

₄feceruntque ita filii Israhel et eiecerunt eos extra castra

sicut locutus erat Dominus Mosi

₅locutus est Dominus ad Mosen dicens

₆loquere ad filios Israhel

vir sive mulier cum fecerint ex omnibus peccatis

quae solent hominibus accidere

et per neglegentiam transgressi fuerint mandatum Domini atque

deliquerint

₇confitebuntur peccatum suum

et reddent ipsum caput quintamque partem desuper

ei in quem peccaverint

₈sin autem non fuerit qui recipiat dabunt Domino et erit sacerdotis

excepto ariete qui offertur pro expiatione

ut sit placabilis hostia

₉omnes quoque primitiae quas offerunt filii Israhel

ad sacerdotem pertinent

₁₀et quicquid in sanctuarium offertur a singulis

et traditur manibus sacerdotis ipsius erit

₁₁locutus est Dominus ad Mosen dicens

₁₂loquere ad filios Israhel et dices ad eos

vir cuius uxor erraverit

maritumque contemnens

₁₃dormierit cum altero viro

et hoc maritus deprehendere non quiverit sed latet adulterium

et testibus argui non potest quia non est inventa in stupro

₁₄si spiritus zelotypiae concitaverit virum contra uxorem suam

quae vel polluta est vel falsa suspicione appetitur

₁₅adducet eam ad sacerdotem

et offeret oblationem pro illa

decimam partem sati farinae hordiaciae

non fundet super eam oleum nec inponet tus

quia sacrificium zelotypiae est et oblatio investigans adulterium

₁₆offeret igitur eam sacerdos et statuet coram Domino

₁₇adsumetque aquam sanctam in vase fictili

et pauxillum terrae de pavimento tabernaculi mittet in eam

₁₈cumque steterit mulier in conspectu Domini discoperiet caput eius

et ponet super manus illius sacrificium recordationis et oblationem

zelotypiae

ipse autem tenebit aquas amarissimas

in quibus cum execratione maledicta congessit

₁₉adiurabitque eam et dicet si non dormivit vir alienus tecum

et si non polluta es deserto mariti toro

non te nocebunt aquae istae amarissimae in quas maledicta congessi

₂₀sin autem declinasti a viro tuo atque polluta es

et concubuisti cum altero

₂₁his maledictionibus subiacebis

det te Dominus in maledictionem exemplumque cunctorum in populo

suo

putrescere faciat femur tuum et tumens uterus

disrumpatur

₂₂ingrediantur aquae maledictae in ventrem tuum

et utero tumescente putrescat femur

et respondebit mulier amen amen

₂₃scribetque sacerdos in libello ista maledicta

et delebit ea aquis amarissimis in quas maledicta congessit

₂₄et dabit ei bibere

quas cum exhauserit

₂₅tollet sacerdos de manu eius sacrificium zelotypiae

et elevabit illud coram Domino inponetque super altare

ita dumtaxat ut prius

₂₆pugillum sacrificii tollat de eo quod

offertur

et incendat super altare

et sic potum det mulieri aquas amarissimas

₂₇quas cum biberit

si polluta est et contempto viro adulterii rea

pertransibunt eam aquae maledictionis

et inflato ventre conputrescet femur

eritque mulier in maledictionem et in exemplum omni populo

₂₈quod si polluta non fuerit erit innoxia et faciet liberos

₂₉ista est lex zelotypiae si declinaverit mulier a viro suo et si polluta

fuerit

₃₀maritusque zelotypiae spiritu concitatus

adduxerit eam in conspectu Domini

et fecerit ei sacerdos iuxta omnia quae scripta sunt

₃₁maritus absque culpa erit et illa recipiet iniquitatem suam