LIBER NUMERORUM 7

₁factum est autem in die qua conplevit Moses tabernaculum et erexit illud

unxitque et sanctificavit cum omnibus vasis suis

altare similiter et vasa eius

₂obtulerunt principes Israhel

et capita familiarum qui erant per singulas tribus

praefecti eorum qui numerati fuerant

₃munera coram Domino sex plaustra tecta cum duodecim bubus

unum plaustrum obtulere duo duces et unum bovem singuli

obtuleruntque ea in conspectu tabernaculi

₄ait autem Dominus ad Mosen

₅suscipe ab eis ut serviant in ministerio tabernaculi

et tradas ea Levitis iuxta ordinem ministerii sui

₆itaque cum suscepisset Moses plaustra et boves tradidit eos Levitis

₇duo plaustra et quattuor boves dedit filiis Gerson

iuxta id quod habebant necessarium

₈quattuor alia plaustra et octo boves dedit filiis Merari

secundum officia et cultum suum

sub manu Ithamar filii Aaron sacerdotis

₉filiis autem Caath non dedit plaustra et boves

quia in sanctuario serviunt et onera propriis portant umeris

₁₀igitur obtulerunt duces in dedicationem altaris die qua unctum est

oblationem suam ante altare

₁₁dixitque Dominus ad Mosen

singuli duces per singulos dies offerant munera in dedicationem altaris

₁₂primo die obtulit oblationem suam

Naasson filius Aminadab de tribu Iuda

₁₃fueruntque in ea acetabulum argenteum pondo centum triginta siclorum

fiala argentea habens septuaginta siclos iuxta pondus sanctuarii

utrumque plenum simila conspersa oleo in sacrificium

₁₄mortariolum ex decem siclis aureis plenum incenso

₁₅bovem et arietem et agnum anniculum in holocaustum

₁₆hircumque pro peccato

₁₇et in sacrificio pacificorum

boves duos arietes quinque hircos quinque agnos anniculos quinque

haec est oblatio Naasson filii Aminadab

₁₈secundo die obtulit Nathanahel filius Suar dux de tribu Isachar

₁₉acetabulum argenteum adpendens centum triginta siclos

fialam argenteam habentem septuaginta siclos iuxta pondus sanctuarii

utrumque plenum simila conspersa oleo in sacrificium

₂₀mortariolum aureum habens decem siclos plenum incenso

₂₁bovem de armento et arietem et agnum anniculum in holocaustum

₂₂hircumque pro peccato

₂₃et in sacrificio pacificorum

boves duos arietes quinque hircos quinque agnos anniculos quinque

haec fuit oblatio Nathanahel filii Suar

₂₄tertio die princeps filiorum Zabulon Heliab filius Helon

₂₅obtulit acetabulum argenteum adpendens centum triginta siclos

fialam argenteam habentem septuaginta siclos ad pondus sanctuarii

utrumque plenum simila conspersa oleo in sacrificium

₂₆mortariolum aureum adpendens decem siclos plenum incenso

₂₇bovem de armento et arietem et agnum anniculum in holocaustum

₂₈hircumque pro peccato

₂₉et in sacrificio pacificorum

boves duos arietes quinque hircos quinque agnos anniculos quinque

haec est oblatio Heliab filii Helon

₃₀die quarto princeps filiorum Ruben Helisur filius Sedeur

₃₁obtulit acetabulum argenteum adpendens centum triginta siclos

fialam argenteam habentem septuaginta siclos ad pondus sanctuarii

utrumque plenum simila conspersa oleo in sacrificium

₃₂mortariolum aureum adpendens decem siclos plenum incenso

₃₃bovem de armento et arietem et agnum anniculum in holocaustum

₃₄hircumque pro peccato

₃₅et in hostias pacificorum

boves duos arietes quinque hircos quinque agnos anniculos quinque

haec fuit oblatio Helisur filii Sedeur

₃₆die quinto princeps filiorum Symeon Salamihel filius Surisaddai

₃₇obtulit acetabulum argenteum adpendens centum triginta siclos

fialam argenteam habentem septuaginta siclos ad pondus sanctuarii

utrumque plenum simila conspersa oleo in sacrificium

₃₈mortariolum aureum adpendens decem siclos plenum incenso

₃₉bovem de armento et arietem et agnum anniculum in holocaustum

₄₀hircumque pro peccato

₄₁et in hostias pacificorum

boves duos arietes quinque hircos quinque agnos anniculos quinque

haec fuit oblatio Salamihel filii Surisaddai

₄₂die sexto princeps filiorum Gad Heliasaph filius Duhel

₄₃obtulit acetabulum argenteum adpendens centum triginta siclos

fialam argenteam habentem septuaginta siclos ad pondus sanctuarii

utrumque plenum simila conspersa oleo in sacrificium

₄₄mortariolum aureum adpendens siclos decem plenum

incenso

₄₅bovem de armento et arietem et agnum anniculum in holocaustum

₄₆hircumque pro peccato

₄₇et in hostias pacificorum

boves duos arietes quinque hircos quinque agnos anniculos quinque

haec fuit oblatio Heliasaph filii Duhel

₄₈die septimo princeps filiorum Ephraim Helisama filius Ammiud

₄₉obtulit acetabulum argenteum adpendens centum triginta siclos

fialam argenteam habentem septuaginta siclos ad pondus sanctuarii

utrumque plenum simila conspersa oleo in sacrificium

₅₀mortariolum aureum adpendens decem siclos plenum incenso

₅₁bovem de armento et arietem et agnum anniculum in holocaustum

₅₂hircumque pro peccato

₅₃et in hostias pacificas

boves duos arietes quinque hircos quinque agnos anniculos quinque

haec fuit oblatio Helisama filii Ammiud

₅₄die octavo princeps filiorum Manasse Gamalihel filius Phadassur

₅₅obtulit acetabulum argenteum adpendens centum triginta siclos

fialam argenteam habentem septuaginta siclos ad pondus sanctuarii

utrumque plenum simila conspersa oleo in sacrificium

₅₆mortariolum aureum adpendens decem siclos plenum incenso

₅₇bovem de armento et arietem et agnum anniculum in holocaustum

₅₈hircumque pro peccato

₅₉et in hostias pacificorum

boves duos arietes quinque hircos quinque agnos anniculos quinque

haec fuit oblatio Gamalihel filii Phadassur

₆₀die nono princeps filiorum Beniamin Abidan filius Gedeonis

₆₁obtulit acetabulum argenteum adpendens centum triginta siclos

fialam argenteam habentem septuaginta siclos ad pondus sanctuarii

utrumque plenum simila conspersa oleo in sacrificium

₆₂mortariolum aureum adpendens decem siclos plenum incenso

₆₃bovem de armento et arietem et agnum anniculum in holocaustum

₆₄hircumque pro peccato

₆₅et in hostias pacificorum

boves duos arietes quinque hircos quinque agnos anniculos quinque

haec fuit oblatio Abidan filii Gedeonis

₆₆die decimo princeps filiorum Dan Ahiezer filius Amisaddai

₆₇obtulit acetabulum argenteum adpendens centum triginta siclos

fialam argenteam habentem septuaginta siclos ad pondus sanctuarii

utrumque plenum simila conspersa oleo in sacrificium

₆₈mortariolum aureum adpendens decem siclos plenum incenso

₆₉bovem de armento et arietem et agnum anniculum in holocaustum

₇₀hircumque pro peccato

₇₁et in hostias pacificorum

boves duos arietes quinque hircos quinque agnos anniculos quinque

haec fuit oblatio Ahiezer filii Amisaddai

₇₂die undecimo princeps filiorum Aser Phagaihel filius Ochran

₇₃obtulit acetabulum argenteum adpendens centum triginta siclos

fialam argenteam habentem septuaginta siclos ad pondus sanctuarii

utrumque plenum simila conspersa oleo in sacrificium

₇₄mortariolum aureum adpendens decem siclos plenum incenso

₇₅bovem de armento et arietem et agnum anniculum in holocaustum

₇₆hircumque pro peccato

₇₇et in hostias pacificorum

boves duos arietes quinque hircos quinque agnos anniculos quinque

haec fuit oblatio Phagaihel filii Ochran

₇₈die duodecimo princeps filiorum Nepthalim Achira filius Henan

₇₉obtulit acetabulum argenteum adpendens centum triginta siclos

fialam argenteam habentem septuaginta siclos ad pondus sanctuarii

utrumque plenum simila conspersa oleo in sacrificium

₈₀mortariolum aureum adpendens decem siclos plenum incenso

₈₁bovem de armento et arietem et agnum anniculum in holocaustum

₈₂hircumque pro peccato

₈₃et in hostias pacificorum

boves duos arietes quinque hircos quinque agnos anniculos quinque

haec fuit oblatio Achira filii Henan

₈₄haec in dedicatione altaris oblata sunt a principibus

Israhel

in die qua consecratum est

acetabula argentea duodecim

fialae argenteae duodecim

mortariola aurea duodecim

₈₅ita ut centum triginta argenti siclos haberet unum

acetabulum

et septuaginta siclos una fiala

id est in commune vasorum omnium ex argento

sicli duo milia quadringenti pondere sanctuarii

₈₆mortariola aurea duodecim plena incenso

denos siclos adpendentia pondere sanctuarii

id est simul auri sicli centum viginti

₈₇boves de armento in holocaustum duodecim

arietes duodecim agni anniculi duodecim et libamenta eorum

hirci duodecim pro peccato

₈₈hostiae pacificorum boves viginti quattuor

arietes sexaginta hirci sexaginta agni anniculi sexaginta

haec oblata sunt in dedicatione altaris quando unctum est

₈₉cumque ingrederetur Moses tabernaculum foederis

ut consuleret oraculum

audiebat vocem loquentis ad se de propitiatorio

quod erat super arcam testimonii inter duos cherubin

unde et loquebatur ei