₁psalmus cantici pro dedicatione domus David

₂exaltabo te Domine quoniam salvasti me

et non delectasti inimicos meos super me

₃Domine Deus meus clamavi ad te et sanasti me

₄Domine eduxisti de inferno animam meam

vivificasti me ne descenderem in lacum

₅cantate Domino sancti eius

et confitemini memoriae sanctitatis eius

₆quoniam ad momentum est ira eius et vita in repropitiatione eius

ad vesperum commorabitur fletus et in matutino laus

₇ego autem dixi in abundantia mea

non commovebor in sempiternum

₈Domine in voluntate tua posuisti monti meo fortitudinem

abscondisti faciem tuam et factus sum conturbatus

₉ad Dominum clamabo et Dominum

deprecabor

₁₀quae est utilitas in sanguine meo cum descendero in

corruptionem

numquid confitebitur tibi pulvis aut adnuntiabit veritatem tuam

₁₁audi Domine et miserere mei Domine esto adiutor

₁₂convertisti planctum meum in chorum mihi

solvisti saccum meum et accinxisti me laetitia

₁₃ut laudet te gloria et non taceat

Domine Deus meus in sempiternum confitebor tibi