AD ROMANOS 16

₁commendo autem vobis Phoebem sororem nostram

quae est in ministerio ecclesiae quae est Cenchris

₂ut eam suscipiatis in Domino digne sanctis

et adsistatis ei in quocumque negotio vestri indiguerit

etenim ipsa quoque adstitit multis et mihi ipsi

₃salutate Priscam et Aquilam adiutores meos in Christo Iesu

₄qui pro anima mea suas cervices subposuerunt

quibus non solus ego gratias ago

sed et cunctae ecclesiae gentium

₅et domesticam eorum ecclesiam

salutate Ephaenetum dilectum mihi

qui est primitivus Asiae in Christo

₆salutate Mariam quae multum laboravit in vobis

₇salutate Andronicum et Iuniam

cognatos et concaptivos meos

qui sunt nobiles in apostolis

qui et ante me fuerunt in Christo

₈salutate Ampliatum dilectissimum mihi in Domino

₉salutate Urbanum adiutorem nostrum in Christo

et Stachyn dilectum meum

₁₀salutate Apellen probum in Christo

₁₁salutate eos qui sunt ex Aristoboli

salutate Herodionem cognatum meum

salutate eos qui sunt ex Narcissi qui sunt in Domino

₁₂salutate Tryfenam et Tryfosam quae laborant in Domino

salutate Persidam carissimam

quae multum laboravit in Domino

₁₃salutate Rufum electum in Domino et matrem eius et meam

₁₄salutate Asyncritum Flegonta

Hermen Patrobam Hermam

et qui cum eis sunt fratres

₁₅salutate Filologum et Iuliam Nereum et sororem eius

et Olympiadem et omnes qui cum eis sunt sanctos

₁₆salutate invicem in osculo sancto

salutant vos omnes ecclesiae Christi

₁₇rogo autem vos fratres

ut observetis eos qui dissensiones et offendicula

praeter doctrinam quam vos didicistis faciunt

et declinate ab illis

₁₈huiusmodi enim Christo Domino nostro non serviunt

sed suo ventri

et per dulces sermones et benedictiones seducunt corda innocentium

₁₉vestra enim oboedientia in omnem locum divulgata est

gaudeo igitur in vobis

sed volo vos sapientes esse in bono et simplices in malo

₂₀Deus autem pacis conteret Satanan sub pedibus

vestris velociter

gratia Domini nostri Iesu Christi vobiscum

₂₁salutat vos Timotheus adiutor meus

et Lucius et Iason et Sosipater cognati mei

₂₂saluto vos ego Tertius qui scripsi epistulam in Domino

₂₃salutat vos Gaius hospes meus et universae

ecclesiae

salutat vos Erastus arcarius civitatis et Quartus frater

₂₅ei autem qui potens est vos confirmare

iuxta evangelium meum et praedicationem Iesu Christi

secundum revelationem mysterii temporibus aeternis taciti

₂₆quod nunc patefactum est per scripturas prophetarum

secundum praeceptum aeterni Dei

ad oboeditionem fidei in cunctis gentibus

cognito

₂₇solo sapienti Deo

per Iesum Christum

cui honor in saecula saeculorum amen