LIBER IESU FILII SIRACH 4

₁fili elemosynam pauperis ne fraudes

et oculos tuos ne transvertas a paupere

₂animam esurientem ne despexeris

et non exasperes pauperem in inopia sua

₃cor inopis ne adflixeris et non protrahas datum angustianti

₄rogationem contribulati ne abicias

et non avertas faciem tuam ab egeno

₅ab inope ne avertas oculos propter iram

et non relinquas quaerentibus tibi retro maledicere

₆maledicentis enim te in amaritudine

exaudietur precatio illius

exaudiet autem eum qui fecit illum

₇congregationi pauperum affabilem te facito

et presbytero humilia animam tuam

et magnato humilia caput tuum

₈declina pauperi aurem tuam

et redde debitum tuum

et responde pacifica in mansuetudine

₉libera eum qui iniuriam patitur de manu superbi

et non acide feras in anima tua

₁₀in iudicando esto pupillis misericors ut pater

et pro viro matri illorum

₁₁et eris velut filius Altissimi obaudiens

et miserebitur tui magis quam mater

₁₂sapientia filiis suis vitam inspiravit

et suscipit exquirentes se

et praeibit in viam iustitiae

₁₃et qui illam diligit diligit vitam

et qui vigilaverint ad illam

conplectebuntur placorem eius

₁₄qui tenuerint illam vitam hereditabunt

et quo introibit benedicit Deus

₁₅qui serviunt ei obsequentes erunt Sancto

et eos qui diligunt illam diligit Deus

₁₆qui audit illam iudicat gentes

et qui intuetur illam permanebit

confidens

₁₇si crediderit ei hereditabit illam

et erunt in confirmatione creaturae illorum

₁₈quoniam in temptatione ambulat cum eo

et in primis eligit eum

₁₉timorem et metum et adprobationem inducet

super illum

et cruciabit illum in tribulatione doctrinae suae

donec temptet illum in cogitationibus illius

et credat animae illius

₂₀et firmabit illum

et iterum adducet directum ad illum

₂₁et denudat absconsa

sua

et thesaurizat super illum scientiam et intellectum

iustitiae

₂₂si autem oberraverit derelinquet eum

et tradet illum in manus inimici sui

₂₃fili conserva tempus et devita a malo

₂₄pro anima tua non confundaris dicere verum

₂₅est enim confusio adducens peccatum

et est confusio adducens gloriam et gratiam

₂₆ne accipias faciem adversus faciem tuam

nec adversus animam tuam mendacium

₂₇non reverearis proximum tuum in casum suum

₂₈nec retineas verbum in tempus salutis

non abscondas sapientiam tuam in decore eius

₂₉in lingua enim agnoscitur sapientia

et sensus et scientia et doctrina in verbis veritatis

et firmamentum in operibus iustitiae

₃₀non contradicas veritati ullo modo

et de mendacio ineruditionis tuae confundere

₃₁non confundaris confiteri peccata tua

et ne subicias te homini pro peccato

₃₂noli resistere contra faciem potentis

nec coneris contra ictum fluvii

₃₃pro iustitia agoniare pro anima

tua

et usque ad mortem certa pro iustitia

et Deus expugnabit pro te inimicos tuos

₃₄noli citatus esse in lingua tua

et inutilis et remissus in operibus tuis

₃₅noli esse sicut leo in domo tua

evertens domesticos tuos et opprimens subiectos tibi

₃₆non sit porrecta manus tua ad accipiendum

et ad reddendum collecta