CANTICUM CANTICORUM 6

₁dilectus meus descendit in hortum suum

ad areolam aromatis ut pascatur in hortis et lilia colligat

₂ego dilecto meo et dilectus meus mihi qui pascitur inter lilia

₃pulchra es amica mea suavis et decora sicut Hierusalem

terribilis ut castrorum acies ordinata

₄averte oculos tuos a me quia ipsi me avolare fecerunt

capilli tui sicut grex caprarum quae apparuerunt de Galaad

₅dentes tui sicut grex ovium quae ascenderunt de lavacro

omnes gemellis fetibus et sterilis non est in eis

₆sicut cortex mali punici genae tuae absque occultis

tuis

₇sexaginta sunt reginae et octoginta concubinae

et adulescentularum non est numerus

₈una est columba mea perfecta mea

una est matris suae electa genetrici suae

viderunt illam filiae et beatissimam praedicaverunt

reginae et concubinae et laudaverunt eam

₉quae est ista quae progreditur quasi aurora consurgens

pulchra ut luna electa ut sol

terribilis ut acies ordinata

₁₀descendi ad hortum nucum

ut viderem poma convallis

ut inspicerem si floruisset vinea

et germinassent mala punica

₁₁nescivi anima mea conturbavit me

propter quadrigas Aminadab

₁₂revertere revertere Sulamitis

revertere revertere ut intueamur te