PSALMI IUXTA LXX 106

Confitemini Domino quoniam bonus

quoniam in saeculum misericordia eius

₂dicant qui redempti sunt a Domino quos redemit de manu inimici

de regionibus congregavit eos

₃a solis ortu et occasu et ab aquilone et mari

₄erraverunt in solitudine in inaquoso

viam civitatis habitaculi non invenerunt

₅esurientes et sitientes anima eorum in ipsis defecit

₆et clamaverunt ad Dominum cum tribularentur

et de necessitatibus eorum eripuit eos

₇et deduxit eos in viam rectam ut irent in civitatem habitationis

₈confiteantur Domino misericordiae eius

et mirabilia eius filiis hominum

₉quia satiavit animam inanem et animam esurientem satiavit bonis

₁₀sedentes in tenebris et umbra mortis vinctos in mendicitate et ferro

₁₁quia exacerbaverunt eloquia Dei et consilium Altissimi inritaverunt

₁₂et humiliatum est in laboribus cor eorum

infirmati sunt nec fuit qui adiuvaret

₁₃et clamaverunt ad Dominum cum tribularentur

et de necessitatibus eorum liberavit eos

₁₄et eduxit eos de tenebris et umbra mortis et vincula eorum disrupit

₁₅confiteantur Domino misericordiae eius

et mirabilia eius filiis hominum

₁₆quia contrivit portas aereas et vectes ferreos confregit

₁₇suscepit eos de via iniquitatis eorum

propter iniustitias enim suas humiliati sunt

₁₈omnem escam abominata est anima eorum

et adpropinquaverunt usque ad portas mortis

₁₉et clamaverunt ad Dominum cum tribularentur

et de necessitatibus eorum liberavit eos

₂₀misit verbum suum et sanavit eos

et eripuit eos de interitionibus eorum

₂₁confiteantur Domino misericordiae eius

et mirabilia eius filiis hominum

₂₂et sacrificent sacrificium laudis

et adnuntient opera eius in exultatione

₂₃qui descendunt mare in navibus

facientes operationem in aquis multis

₂₄ipsi viderunt opera Domini et mirabilia eius in profundo

₂₅dixit et stetit spiritus procellae et exaltati sunt fluctus eius

₂₆ascendunt usque ad caelos et descendunt usque ad abyssos

anima eorum in malis tabescebat

₂₇turbati sunt et moti sunt sicut ebrius

et omnis sapientia eorum devorata est

₂₈et clamaverunt ad Dominum cum tribularentur

et de necessitatibus eorum eduxit eos

₂₉et statuit procellam ÷eius: in auram et siluerunt fluctus eius

₃₀et laetati sunt quia siluerunt

et deduxit eos in portum voluntatis eorum

₃₁confiteantur Domino misericordiae eius

et mirabilia eius filiis hominum

₃₂exaltent eum in ecclesia plebis

et in cathedra seniorum laudent eum

₃₃posuit flumina in desertum et exitus aquarum in sitim

₃₄terram fructiferam in salsuginem a malitia inhabitantium in ea

₃₅posuit desertum in stagna aquarum

et terram sine aqua in exitus aquarum

₃₆et conlocavit illic esurientes

et constituerunt civitatem habitationis

₃₇et seminaverunt agros et plantaverunt vineas

et fecerunt fructum nativitatis

₃₈et benedixit eis et multiplicati sunt nimis

et iumenta eorum non minoravit

₃₉et pauci facti sunt et vexati sunt a tribulatione malorum et dolore

₄₀effusa est contemptio super principes

et errare fecit eos in invio et non in via

₄₁et adiuvit pauperem de inopia

et posuit sicut oves familias

₄₂videbunt recti et laetabuntur

et omnis iniquitas oppilabit os suum

₄₃quis sapiens et custodiet haec

et intellegent misericordias Domini