PSALMI IUXTA LXX 108

₂Deus laudem meam ne tacueris

quia os peccatoris et os dolosi super me apertum est

₃locuti sunt adversum me lingua dolosa

et sermonibus odii circuierunt me

et expugnaverunt me gratis

₄pro eo ut me diligerent detrahebant mihi ego autem orabam

₅et posuerunt adversus me mala pro bonis

et odium pro dilectione mea

₆constitue super eum peccatorem

et diabulus stet a dextris eius

₇cum iudicatur exeat condemnatus et oratio eius fiat in peccatum

₈fiant dies eius pauci et episcopatum eius accipiat alter

₉fiant filii eius orfani et uxor eius vidua

₁₀nutantes transferantur filii eius et mendicent

eiciantur de habitationibus suis

₁₁scrutetur fenerator omnem substantiam eius

et diripiant alieni labores eius

₁₂non sit illi adiutor nec sit qui misereatur pupillis eius

₁₃fiant nati eius in interitum

in generatione una deleatur nomen eius

₁₄in memoriam redeat iniquitas patrum eius in conspectu Domini

et peccatum matris eius non deleatur

₁₅fiant contra Dominum semper

et dispereat de terra memoria eorum

₁₆pro eo quod non est recordatus facere misericordiam

₁₇et persecutus est hominem inopem et mendicum

et conpunctum corde mortificare

₁₈et dilexit maledictionem et veniet ei

et noluit benedictionem et elongabitur ab eo

et induit maledictionem sicut vestimentum

et intravit sicut aqua in interiora eius et sicut oleum in ossibus eius

₁₉fiat ei sicut vestimentum quo operitur

et sicut zona qua semper praecingitur

₂₀hoc opus eorum qui detrahunt mihi apud Dominum

et qui loquuntur mala adversus animam meam

₂₁et tu Domine Domine fac mecum propter nomen tuum

quia suavis misericordia tua

libera me

₂₂quia egenus et pauper ego sum

et cor meum turbatum est intra me

₂₃sicut umbra cum declinat ablatus sum

excussus sum sicut lucustae

₂₄genua mea infirmata sunt a ieiunio

et caro mea inmutata est propter oleum

₂₅et ego factus sum obprobrium illis

viderunt me moverunt capita sua

₂₆adiuva me Domine Deus meus

salvum fac me secundum misericordiam tuam

₂₇et sciant quia manus tua haec tu Domine fecisti eam

₂₈maledicent illi et tu benedices

qui insurgunt in me confundantur

servus autem tuus laetabitur

₂₉induantur qui detrahunt mihi pudore

et operiantur sicut deploide confusione sua

₃₀confitebor Domino nimis in ore meo

et in medio multorum laudabo eum

₃₁quia adstitit a dextris pauperis

ut salvam faceret a persequentibus animam meam