PSALMI IUXTA LXX 11

₂Salvum me fac Domine quoniam defecit sanctus

quoniam deminutae sunt veritates a filiis hominum

₃vana locuti sunt unusquisque ad proximum suum

labia dolosa in corde et corde locuti sunt

₄disperdat Dominus universa labia dolosa linguam magniloquam

₅qui dixerunt linguam nostram magnificabimus

labia nostra a nobis sunt quis noster dominus est

₆propter miseriam inopum et gemitum pauperum

nunc exsurgam dicit Dominus

ponam in salutari fiducialiter agam in eo

₇eloquia Domini eloquia casta

argentum igne examinatum probatum terrae purgatum septuplum

₈tu Domine servabis nos et custodies nos

a generatione hac et in aeternum

₉in circuitu impii ambulant

secundum altitudinem tuam multiplicasti filios hominum