Nisi quia Dominus erat in nobis dicat nunc Israhel

₂nisi quia Dominus erat in nobis

cum exsurgerent in nos homines

₃forte vivos degluttissent nos

cum irasceretur furor eorum in nos

₄forsitan aqua absorbuisset nos

₅torrentem pertransivit anima nostra

forsitan pertransisset anima nostra aquam intolerabilem

₆benedictus Dominus

qui non dedit nos in captionem dentibus eorum

₇anima nostra sicut passer erepta est de laqueo venantium

laqueus contritus est et nos liberati sumus

₈adiutorium nostrum in nomine Domini qui fecit caelum et terram