PSALMI IUXTA LXX 136

Super flumina Babylonis illic sedimus et flevimus

cum recordaremur Sion

₂in salicibus in medio eius suspendimus organa nostra

₃quia illic interrogaverunt nos qui captivos duxerunt nos

verba cantionum

et qui abduxerunt nos hymnum cantate nobis de canticis Sion

₄quomodo cantabimus canticum Domini in terra aliena

₅si oblitus fuero tui Hierusalem oblivioni detur dextera mea

₆adhereat lingua mea faucibus meis si non meminero tui

si non praeposuero Hierusalem

in principio laetitiae meae

₇memor esto Domine filiorum Edom diem

Hierusalem

qui dicunt exinanite exinanite usque ad fundamentum in ea

₈filia Babylonis misera

beatus qui retribuet tibi retributionem tuam quam retribuisti

nobis

₉beatus qui tenebit et adlidet parvulos tuos ad petram