PSALMI IUXTA LXX 139

₂Eripe me Domine ab homine malo a viro iniquo eripe me

₃qui cogitaverunt iniquitates in corde

tota die constituebant proelia

₄acuerunt linguam suam sicut serpentis

venenum aspidum sub labiis eorum diapsalma

₅custodi me Domine de manu peccatoris

ab hominibus iniquis eripe me

qui cogitaverunt subplantare gressus meos

₆absconderunt superbi laqueum mihi

et funes extenderunt in laqueum

iuxta iter scandalum posuerunt mihi diapsalma

₇dixi Domino Deus meus es tu

exaudi Domine vocem deprecationis meae

₈Domine Domine virtus salutis meae

obumbrasti super caput meum in die belli

₉non tradas Domine desiderio meo peccatori

cogitaverunt contra me ne derelinquas me

ne forte exaltentur diapsalma

₁₀caput circuitus eorum labor labiorum ipsorum operiet eos

₁₁cadent super eos carbones in igne deicies eos

in miseriis non subsistent

₁₂vir linguosus non dirigetur in terra

virum iniustum mala capient in interitu

₁₃cognovi quia faciet Dominus iudicium inopis

et vindictam pauperum

₁₄verumtamen iusti confitebuntur nomini tuo

habitabunt recti cum vultu tuo