PSALMI IUXTA LXX 140

Domine clamavi ad te exaudi me

intende voci meae cum clamavero ad te

₂dirigatur oratio mea sicut incensum in conspectu tuo

elevatio manuum mearum sacrificium vespertinum

₃pone Domine custodiam ori meo

et ostium circumstantiae labiis meis

₄non declines cor meum in verba malitiae

ad excusandas excusationes in peccatis

cum hominibus operantibus iniquitatem

et non communicabo cum electis eorum

₅corripiet me iustus in misericordia et increpabit me

oleum ÷autem: peccatoris non inpinguet caput meum

quoniam adhuc et oratio mea in beneplacitis eorum

₆absorti sunt iuncti petrae iudices eorum

audient verba mea quoniam potuerunt

₇sicut crassitudo terrae erupta est super terram

dissipata sunt ossa nostra secus infernum

₈quia ad te Domine Domine oculi mei

in te speravi non auferas animam meam

₉custodi me a laqueo quem statuerunt mihi

et ab scandalis operantium iniquitatem

₁₀cadent in retiaculo eius peccatores

singulariter sum ego donec transeam