PSALMI IUXTA LXX 2

Quare fremuerunt gentes et populi meditati sunt inania

₂adstiterunt reges terrae et principes convenerunt in unum

adversus Dominum et adversus christum eius diapsalma

₃disrumpamus vincula eorum

et proiciamus a nobis iugum ipsorum

₄qui habitat in caelis inridebit eos

et Dominus subsannabit eos

₅tunc loquetur ad eos in ira sua

et in furore suo conturbabit eos

₆ego autem constitutus sum rex ab eo

super Sion montem sanctum eius

praedicans praeceptum eius

₇Dominus dixit ad me filius meus es tu ego hodie genui te

₈postula a me et dabo tibi gentes hereditatem tuam

et possessionem tuam terminos terrae

₉reges eos in virga ferrea

tamquam vas figuli confringes eos

₁₀et nunc reges intellegite

erudimini qui iudicatis terram

₁₁servite Domino in timore et exultate ei in tremore

₁₂adprehendite disciplinam

nequando irascatur Dominus et pereatis de via iusta

₁₃cum exarserit in brevi ira eius beati omnes qui confidunt in eo