PSALMI IUXTA LXX 25

Iudica me Domine quoniam ego in innocentia mea ingressus sum

et in Domino sperans non infirmabor

₂proba me Domine et tempta me ure renes meos et cor meum

₃quoniam misericordia tua ante oculos meos est

et conplacui in veritate tua

₄non sedi cum concilio vanitatis

et cum iniqua gerentibus non introibo

₅odivi ecclesiam malignantium et cum impiis non sedebo

₆lavabo inter innocentes manus meas

et circumdabo altare tuum Domine

₇ut audiam vocem laudis et enarrem universa mirabilia tua

₈Domine dilexi decorem domus tuae

et locum habitationis gloriae tuae

₉ne perdas cum impiis animam meam

et cum viris sanguinum vitam meam

₁₀in quorum manibus iniquitates sunt

dextera eorum repleta est muneribus

₁₁ego autem in innocentia mea ingressus sum

redime me et miserere mei

₁₂pes meus stetit in directo

in ecclesiis benedicam ÷te: Domine