PSALMI IUXTA LXX 31

Beati quorum remissae sunt iniquitates

et quorum tecta sunt peccata

₂beatus vir cui non inputabit Dominus peccatum

nec est in spiritu eius dolus

₃quoniam tacui inveteraverunt ossa mea dum clamarem tota die

₄quoniam die ac nocte gravata est super me manus tua

conversus sum in aerumna ※mea:

dum configitur ÷mihi: spina diapsalma

₅delictum meum cognitum ※tibi: feci

et iniustitiam meam non abscondi

dixi confitebor adversus me iniustitiam meam Domino

et tu remisisti impietatem peccati mei diapsalma

₆pro hac orabit ad te omnis sanctus in tempore oportuno

verumtamen in diluvio aquarum multarum

ad eum non adproximabunt

₇tu es refugium meum a tribulatione quae circumdedit me

exultatio mea erue me a circumdantibus me diapsalma

₈intellectum tibi dabo et instruam te in via hac qua gradieris

firmabo super te oculos meos

₉nolite fieri sicut equus et mulus quibus non est intellectus

in camo et freno maxillas eorum constringe

qui non adproximant ad te

₁₀multa flagella peccatoris

sperantem autem in Domino misericordia circumdabit

₁₁laetamini in Domino et exultate iusti

et gloriamini omnes recti corde