PSALMI IUXTA LXX 33

₂Benedicam Dominum in omni tempore

semper laus eius in ore meo

₃in Domino laudabitur anima mea

audiant mansueti et laetentur

₄magnificate Dominum mecum

et exaltemus nomen eius in id ipsum

₅exquisivi Dominum et exaudivit me

et ex omnibus tribulationibus meis eripuit me

₆accedite ad eum et inluminamini

et facies vestrae non confundentur

₇iste pauper clamavit et Dominus exaudivit ÷eum:

et de omnibus tribulationibus eius salvavit

eum

₈vallabit angelus Domini in

circuitu timentium eum

et eripiet eos

₉gustate et videte quoniam suavis est Dominus

beatus vir qui sperat in eo

₁₀timete Dominum ÷omnes: sancti eius

quoniam non est inopia timentibus eum

₁₁divites eguerunt et esurierunt

inquirentes autem Dominum non minuentur omni bono diapsalma

₁₂venite filii audite me timorem Domini docebo vos

₁₃quis est homo qui vult vitam

cupit videre dies bonos

₁₄prohibe linguam tuam a malo et labia tua ne loquantur dolum

₁₅deverte a malo et fac bonum

inquire pacem et persequere eam

₁₆oculi Domini super iustos

et aures eius in precem eorum

₁₇facies Domini super facientes mala

ut perdat de terra memoriam eorum

₁₈clamaverunt iusti et Dominus exaudivit

et ex omnibus tribulationibus eorum liberavit eos

₁₉iuxta est Dominus his qui tribulato sunt corde

et humiles spiritu salvabit

₂₀multae tribulationes iustorum

et de omnibus his liberavit eos

₂₁Dominus custodit omnia ossa eorum

unum ex his non conteretur

₂₂mors peccatorum pessima et qui oderunt iustum delinquent

₂₃redimet Dominus animas servorum suorum

et non delinquent omnes qui sperant in eum