PSALMI IUXTA LXX 34

Iudica Domine nocentes me expugna expugnantes me

₂adprehende arma et scutum et exsurge in adiutorium mihi

₃effunde frameam et conclude adversus eos qui persequuntur me

dic animae meae salus tua ego sum

₄confundantur et revereantur quaerentes animam meam

avertantur retrorsum et confundantur cogitantes mihi mala

₅fiant tamquam pulvis ante faciem venti

et angelus Domini coartans eos

₆fiat via illorum tenebrae et lubricum

et angelus Domini persequens eos

₇quoniam gratis absconderunt mihi interitum laquei sui

supervacue exprobraverunt animam meam

₈veniat illi laqueus quem ignorat

et captio quam abscondit conprehendat eum

et in laqueo cadat in ipso

₉anima autem mea exultabit in Domino

delectabitur super salutari suo

₁₀omnia ossa mea dicent Domine quis similis tui

eripiens inopem de manu fortiorum eius

egenum et pauperem a diripientibus eum

₁₁surgentes testes iniqui quae ignorabam interrogabant me

₁₂retribuebant mihi mala pro bonis sterilitatem animae meae

₁₃ego autem cum mihi molesti essent induebar cilicio

humiliabam in ieiunio animam meam

et oratio mea in sinum meum convertetur

₁₄quasi proximum quasi fratrem nostrum sic conplacebam

quasi lugens et contristatus sic humiliabar

₁₅et adversum me laetati sunt et convenerunt

congregata sunt super me flagella et ignoravi

₁₆dissipati sunt nec conpuncti

temptaverunt me subsannaverunt me subsannatione

frenduerunt super me dentibus suis

₁₇Domine quando respicies

restitue animam meam a malignitate eorum

a leonibus unicam meam

₁₈confitebor tibi in ecclesia magna in populo gravi laudabo te

₁₉non supergaudeant mihi qui adversantur mihi inique

qui oderunt me gratis et annuunt oculis

₂₀quoniam mihi quidem pacifice loquebantur

et in iracundia ※terrae loquentes: dolos cogitabant

₂₁et dilataverunt super me os suum

dixerunt euge euge viderunt oculi nostri

₂₂vidisti Domine ne sileas Domine ne discedas a me

₂₃exsurge et intende iudicio meo

Deus meus et Dominus meus in causam meam

₂₄iudica me secundum iustitiam tuam Domine Deus meus

et non supergaudeant mihi

₂₅non dicant in cordibus suis euge euge animae nostrae

nec dicant devoravimus eum

₂₆erubescant et revereantur simul qui gratulantur malis meis

induantur confusione et reverentia

qui magna loquuntur super me

₂₇exultent et laetentur qui volunt iustitiam meam

et dicant semper magnificetur Dominus

qui volunt pacem servi eius

₂₈et lingua mea meditabitur iustitiam tuam tota die laudem tuam