PSALMI IUXTA LXX 35

₂Dixit iniustus ut delinquat in semet ipso

non est timor Dei ante oculos eius

₃quoniam dolose egit in conspectu eius

ut inveniatur iniquitas eius ad odium

₄verba oris eius iniquitas et dolus

noluit intellegere ut bene ageret

₅iniquitatem meditatus est in cubili suo

adstitit omni viae non bonae malitiam autem non odivit

₆Domine in caelo misericordia tua et veritas tua usque ad nubes

₇iustitia tua sicut montes Dei iudicia tua abyssus multa

homines et iumenta salvabis Domine

₈quemadmodum multiplicasti misericordiam tuam Deus

filii autem hominum in tegmine alarum tuarum sperabunt

₉inebriabuntur ab ubertate domus tuae

et torrente voluntatis tuae potabis eos

₁₀quoniam apud te fons vitae

in lumine tuo videbimus lumen

₁₁praetende misericordiam tuam scientibus te

et iustitiam tuam his qui recto sunt corde

₁₂non veniat mihi pes superbiae et manus peccatoris non moveat me

₁₃ibi ceciderunt qui operantur iniquitatem

expulsi sunt nec potuerunt stare