PSALMI IUXTA LXX 40

₂Beatus qui intellegit super egenum et pauperem

in die mala liberabit eum Dominus

₃Dominus conservet eum et vivificet eum

et beatum faciat eum in terra

et non tradat eum in animam inimicorum eius

₄Dominus opem ferat illi super lectum doloris eius

universum stratum eius versasti in infirmitate eius

₅ego dixi Domine miserere mei

sana animam meam quoniam peccavi tibi

₆inimici mei dixerunt mala mihi

quando morietur et peribit nomen eius

₇et si ingrediebatur ut videret vane loquebatur

cor eius congregavit iniquitatem sibi

egrediebatur foras et loquebatur

₈in id ipsum

adversum me susurrabant omnes inimici mei

adversus me cogitabant mala mihi

₉verbum iniquum constituerunt adversus me

numquid qui dormit non adiciet ut resurgat

₁₀etenim homo pacis meae in quo speravi

qui edebat panes meos magnificavit super me subplantationem

₁₁tu autem Domine miserere mei et resuscita me et retribuam eis

₁₂in hoc cognovi quoniam voluisti me

quoniam non gaudebit inimicus meus super me

₁₃me autem propter innocentiam suscepisti

et confirmasti me in conspectu tuo in aeternum

₁₄benedictus Dominus Deus Israhel

a saeculo et in saeculum fiat fiat