PSALMI IUXTA LXX 45

₂Deus noster refugium et virtus

adiutor in tribulationibus quae invenerunt nos nimis

₃propterea non timebimus dum turbabitur terra

et transferentur montes in cor maris

₄sonaverunt et turbatae sunt aquae eorum

conturbati sunt montes in fortitudine eius diapsalma

₅fluminis impetus laetificat civitatem Dei

sanctificavit tabernaculum suum Altissimus

₆Deus in medio eius non commovebitur

adiuvabit eam Deus mane diluculo

₇conturbatae sunt gentes inclinata sunt regna

dedit vocem suam mota est terra

₈Dominus virtutum nobiscum

susceptor noster Deus Iacob diapsalma

₉venite et videte opera Domini quae posuit prodigia super terram

₁₀auferens bella usque ad finem terrae

arcum conteret et confringet arma

et scuta conburet in igne

₁₁vacate et videte quoniam ego sum Deus

exaltabor in gentibus exaltabor in terra

₁₂Dominus virtutum nobiscum susceptor noster Deus Iacob