PSALMI IUXTA LXX 47

₂Magnus Dominus et laudabilis nimis

in civitate Dei nostri in monte sancto eius

₃fundatur exultatione universae terrae

montes Sion latera aquilonis civitas regis magni

₄Deus in domibus eius cognoscitur cum suscipiet eam

₅quoniam ecce reges congregati sunt

convenerunt in unum

₆ipsi videntes sic admirati sunt

conturbati sunt commoti sunt

₇tremor adprehendit eos

ibi dolores ut parturientis

₈in spiritu vehementi conteres naves Tharsis

₉sicut audivimus sic vidimus

in civitate Domini virtutum in civitate Dei nostri

Deus fundavit eam in aeternum diapsalma

₁₀suscepimus Deus misericordiam tuam

in medio templi tui

₁₁secundum nomen tuum Deus sic et laus tua in fines terrae

iustitia plena est dextera tua

₁₂laetetur mons Sion

exultent filiae Iudaeae propter

iudicia tua ÷Domine:

₁₃circumdate Sion et conplectimini eam

narrate in turribus eius

₁₄ponite corda vestra in virtute eius et distribuite domus eius

ut enarretis in progeniem alteram

₁₅quoniam hic est Deus Deus noster

in aeternum et in saeculum saeculi

ipse reget nos in saecula