PSALMI IUXTA LXX 52

Dixit insipiens in corde suo non est Deus

₂corrupti sunt et abominabiles facti sunt in iniquitatibus

non est qui faciat bonum

₃Deus de caelo prospexit in filios hominum

ut videat si est intellegens ÷aut: requirens Deum

₄omnes declinaverunt simul inutiles facti sunt

non est qui faciat bonum non est usque ad unum

₅nonne scient ÷omnes: qui operantur iniquitatem

qui devorant plebem meam ut cibum panis

₆Deum non invocaverunt

illic trepidabunt timore ubi non fuit

timor

quoniam Deus dissipavit ossa eorum qui hominibus placent

confusi sunt quoniam Deus sprevit eos

₇quis dabit ex Sion salutare Israhel

dum convertit Deus

captivitatem plebis suae

exultabit Iacob et laetabitur Israhel