PSALMI IUXTA LXX 58

₂Eripe me de inimicis meis Deus

et ab insurgentibus in me libera me

₃eripe me de operantibus iniquitatem

et de viris sanguinum salva me

₄quia ecce ceperunt animam meam inruerunt in me fortes

₅neque iniquitas mea neque peccatum meum

Domine sine iniquitate cucurri et direxi

₆exsurge in occursum meum et vide

et tu Domine Deus virtutum Deus Israhel

intende ad visitandas omnes gentes

non miserearis omnibus qui operantur iniquitatem diapsalma

₇convertentur ad vesperam

et famem patientur ut canes et circuibunt civitatem

₈ecce loquentur in ore suo

et gladius in labiis eorum quoniam quis audivit

₉et tu Domine deridebis eos

ad nihilum deduces omnes gentes

₁₀fortitudinem meam ad te custodiam

quia Deus susceptor meus

₁₁Deus meus voluntas eius praeveniet me

₁₂Deus ostendet mihi super inimicos meos

ne occidas eos nequando obliviscantur populi mei

disperge illos in virtute tua

et depone eos protector meus Domine

₁₃delictum oris eorum sermonem labiorum ipsorum

et conprehendantur in superbia sua

et de execratione et mendacio adnuntiabuntur

₁₄in consummatione

in ira consummationis et non erunt

et scient quia Deus dominatur Iacob finium terrae diapsalma

₁₅convertentur ad vesperam

et famem patientur ut canes et circuibunt civitatem

₁₆ipsi dispergentur ad manducandum

si vero non fuerint saturati et murmurabunt

₁₇ego autem cantabo fortitudinem tuam

et exultabo mane misericordiam tuam

quia factus es susceptor meus

et refugium meum in die tribulationis meae

₁₈adiutor meus tibi psallam

quia Deus susceptor meus es Deus meus misericordia mea