PSALMI IUXTA LXX 6

₂Domine ne in furore tuo arguas me neque in ira tua corripias me

₃miserere mei Domine quoniam infirmus sum

sana me Domine quoniam conturbata sunt ossa mea

₄et anima mea turbata est valde et tu Domine usquequo

₅convertere Domine eripe animam meam

salvum me fac propter misericordiam tuam

₆quoniam non est in morte qui memor sit tui

in inferno autem quis confitebitur tibi

₇laboravi in gemitu meo

lavabo per singulas noctes lectum meum

in lacrimis meis stratum meum rigabo

₈turbatus est a furore oculus meus

inveteravi inter omnes inimicos meos

₉discedite a me omnes qui operamini iniquitatem

quoniam exaudivit Dominus vocem fletus mei

₁₀exaudivit Dominus deprecationem meam

Dominus orationem meam suscepit

₁₁erubescant et conturbentur vehementer omnes inimici mei

convertantur et erubescant valde velociter