PSALMI IUXTA LXX 7

₂Domine Deus meus in te speravi

salvum me fac ex omnibus persequentibus me et libera me

₃nequando rapiat ut leo animam meam

dum non est qui redimat neque qui salvum faciat

₄Domine Deus meus si feci istud si est iniquitas in manibus meis

₅si reddidi retribuentibus mihi mala

decidam merito ab inimicis meis inanis

₆persequatur inimicus animam meam et conprehendat

et conculcet in terra vitam meam

et gloriam meam in pulverem deducat diapsalma

₇exsurge Domine in ira tua

exaltare in finibus inimicorum meorum

et exsurge Domine Deus meus in praecepto quod mandasti

₈et synagoga populorum circumdabit te

et propter hanc in altum regredere

₉Dominus iudicat populos

iudica me Domine secundum iustitiam meam

et secundum innocentiam meam super me

₁₀consummetur nequitia peccatorum

et diriges iustum et scrutans corda et renes Deus

₁₁iustum adiutorium meum a Deo

qui salvos facit rectos corde

₁₂Deus iudex iustus et fortis et patiens

numquid irascitur per singulos dies

₁₃nisi conversi fueritis gladium suum vibrabit

arcum suum tetendit et paravit illum

₁₄et in eo paravit vasa mortis sagittas suas ardentibus effecit

₁₅ecce parturiit iniustitiam

※et: concepit dolorem et peperit iniquitatem

₁₆lacum aperuit et effodit eum

et incidet in foveam quam fecit

₁₇convertetur dolor eius in caput eius

et in verticem ipsius iniquitas eius descendet

₁₈confitebor Domino secundum iustitiam eius

et psallam nomini Domini altissimi