PSALMI IUXTA LXX 77

Adtendite populus meus legem meam

inclinate aurem vestram in verba oris mei

₂aperiam in parabola os meum

eloquar propositiones ab initio

₃quanta audivimus et cognovimus ea

et patres nostri narraverunt nobis

₄non sunt occultata a filiis eorum in generationem alteram

narrantes laudes Domini et virtutes eius

et mirabilia eius quae fecit

₅et suscitavit testimonium in Iacob et legem posuit in Israhel

quanta mandavit patribus nostris nota facere ea filiis suis

₆ut cognoscat generatio altera

filii qui nascentur et exsurgent et narrabunt filiis suis

₇ut ponant in Deo spem suam et non obliviscantur opera Dei

et mandata eius exquirant

₈ne fiant sicut patres eorum generatio prava et exasperans

generatio quae non direxit cor suum

et non est creditus cum Deo spiritus eius

₉filii Effrem intendentes et mittentes arcus

conversi sunt in die belli

₁₀non custodierunt testamentum Dei

et in lege eius noluerunt ambulare

₁₁et obliti sunt benefactorum eius

et mirabilium eius quae ostendit eis

₁₂coram patribus eorum quae fecit mirabilia

in terra Aegypti in campo Taneos

₁₃interrupit mare et perduxit eos

statuit aquas quasi utrem

₁₄et deduxit eos in nube diei

et tota nocte in inluminatione ignis

₁₅interrupit petram in heremo

et adaquavit eos velut in abysso multa

₁₆et eduxit aquam de petra

et deduxit tamquam flumina aquas

₁₇et adposuerunt adhuc peccare ei

in ira excitaverunt Excelsum in inaquoso

₁₈et temptaverunt Deum in cordibus suis

ut peterent escas animabus suis

₁₉et male locuti sunt de Deo

dixerunt numquid poterit Deus parare mensam in deserto

₂₀quoniam percussit petram et fluxerunt aquae

et torrentes inundaverunt

numquid et panem potest dare

aut parare mensam populo suo

₂₁ideo audivit Dominus et distulit

et ignis accensus est in Iacob

et ira ascendit in Israhel

₂₂quia non crediderunt in Deo

nec speraverunt in salutare eius

₂₃et mandavit nubibus desuper et ianuas caeli aperuit

₂₄et pluit illis manna ad manducandum

et panem caeli dedit eis

₂₅panem angelorum manducavit homo

cibaria misit eis in abundantiam

₂₆transtulit austrum de caelo et induxit in virtute sua africum

₂₇et pluit super eos sicut pulverem carnes

et sicut harenam maris volatilia pinnata

₂₈et ceciderunt in medio castrorum eorum circa tabernacula eorum

₂₉et manducaverunt et saturati sunt nimis

et desiderium eorum adtulit eis

₃₀non sunt fraudati a desiderio suo

adhuc escae eorum erant in ore ipsorum

₃₁et ira Dei ascendit in eos

et occidit pingues eorum et electos Israhel inpedivit

₃₂in omnibus his peccaverunt adhuc

et non crediderunt mirabilibus eius

₃₃et defecerunt in vanitate dies eorum

et anni eorum cum festinatione

₃₄cum occideret eos quaerebant eum

et revertebantur et diluculo veniebant ad Deum

₃₅et rememorati sunt quia Deus adiutor est eorum

et Deus excelsus redemptor eorum est

₃₆et dilexerunt eum in ore suo et lingua sua mentiti sunt ei

₃₇cor autem ipsorum non erat rectum cum eo

nec fideles habiti sunt in testamento eius

₃₈ipse autem est misericors et propitius fiet peccatis eorum

et non perdet eos

et abundabit ut avertat iram suam

et non accendet omnem iram suam

₃₉et recordatus est quia caro sunt spiritus vadens et non rediens

₄₀quotiens exacerbaverunt eum in deserto

in ira concitaverunt eum in inaquoso

₄₁et conversi sunt et temptaverunt Deum

et Sanctum Israhel exacerbaverunt

₄₂non sunt recordati manus eius

die qua redemit eos de manu tribulantis

₄₃sicut posuit in Aegypto signa sua et prodigia sua in campo Taneos

₄₄et convertit in sanguine flumina eorum

et imbres eorum ne biberent

₄₅misit in eos cynomiam et comedit eos

et ranam et disperdit eos

₄₆et dedit erugini fructus eorum et labores eorum lucustae

₄₇et occidit in grandine vineam eorum

et moros eorum in pruina

₄₈et tradidit grandini iumenta eorum et possessionem eorum igni

₄₉misit in eos iram indignationis suae

indignationem et iram et tribulationem

inmissionem per angelos malos

₅₀viam fecit semitae irae suae

non pepercit a morte animarum eorum

et iumenta eorum in morte conclusit

₅₁et percussit omne primitivum in

terra Aegypti

primitias laborum eorum in tabernaculis Cham

₅₂et abstulit sicut oves populum suum

et perduxit eos tamquam gregem in deserto

₅₃et deduxit eos in spe et non timuerunt

et inimicos eorum operuit mare

₅₄et induxit eos in montem sanctificationis suae

montem quem adquisivit dextera eius

et eiecit a facie eorum gentes

et sorte divisit eis terram in funiculo distributionis

₅₅et habitare fecit in tabernaculis eorum tribus Israhel

₅₆et temptaverunt et exacerbaverunt Deum excelsum

et testimonia eius non custodierunt

₅₇et averterunt se et non servaverunt pactum

quemadmodum patres eorum conversi sunt in arcum pravum

₅₈et in ira concitaverunt eum in collibus suis

et in sculptilibus suis ad aemulationem eum provocaverunt

₅₉audivit Deus et sprevit et ad nihilum redegit valde Israhel

₆₀et reppulit tabernaculum Selo

tabernaculum suum ubi habitavit in hominibus

₆₁et tradidit in captivitatem virtutem eorum

et pulchritudinem eorum in manus inimici

₆₂et conclusit in gladio populum suum et hereditatem suam sprevit

₆₃iuvenes eorum comedit ignis

et virgines eorum non sunt lamentatae

₆₄sacerdotes eorum in gladio ceciderunt

et viduae eorum non plorabuntur

₆₅et excitatus est tamquam dormiens Dominus

tamquam potens crapulatus a vino

₆₆et percussit inimicos suos in posteriora

obprobrium sempiternum dedit illis

₆₇et reppulit tabernaculum Ioseph

et tribum Effrem non elegit

₆₈et elegit tribum Iuda montem Sion quem dilexit

₆₉et aedificavit sicut unicornium sanctificium suum

in terra quam fundavit in saecula

₇₀et elegit David servum suum et sustulit eum de gregibus ovium

de post fetantes accepit eum

₇₁pascere Iacob servum suum et Israhel hereditatem suam

₇₂et pavit eos in innocentia cordis sui

et in intellectibus manuum suarum deduxit eos