PSALMI IUXTA LXX 79

₂Qui regis Israhel intende

qui deducis tamquam oves Ioseph

qui sedes super cherubin manifestare

₃coram Effraim et Beniamin et Manasse

excita potentiam tuam et veni ut salvos facias nos

₄Deus converte nos et ostende faciem tuam et salvi erimus

₅Domine Deus virtutum

quousque irasceris super orationem servi tui

₆cibabis nos pane lacrimarum

et potum dabis nobis in lacrimis in mensura

₇posuisti nos in contradictionem vicinis nostris

et inimici nostri subsannaverunt nos

₈Deus virtutum converte nos

et ostende faciem tuam et salvi erimus

₉vineam de Aegypto transtulisti eiecisti gentes et plantasti eam

₁₀dux itineris fuisti in conspectu eius

et plantasti radices eius et implevit terram

₁₁operuit montes umbra eius et arbusta eius cedros Dei

₁₂extendit palmites suos usque ad mare

et usque ad Flumen propagines eius

₁₃ut quid destruxisti maceriam eius

et vindemiant eam omnes qui praetergrediuntur viam

₁₄exterminavit eam aper de silva

et singularis ferus depastus est eam

₁₅Deus virtutum convertere

respice de caelo et vide et visita vineam istam

₁₆et perfice eam quam plantavit dextera tua

et super filium quem confirmasti tibi

₁₇incensa igni et suffossa ab increpatione vultus tui peribunt

₁₈fiat manus tua super virum dexterae tuae

et super filium hominis quem confirmasti tibi

₁₉et non discedimus a te

vivificabis nos et nomen tuum invocabimus

₂₀Domine Deus virtutum converte nos

et ostende faciem tuam et salvi erimus