PSALMI IUXTA LXX 84

₂Benedixisti Domine terram tuam avertisti captivitatem Iacob

₃remisisti iniquitates plebis tuae

operuisti omnia peccata eorum diapsalma

₄mitigasti omnem iram tuam avertisti ab ira indignationis tuae

₅converte nos Deus salutum nostrarum

et averte iram tuam a nobis

₆numquid in aeternum irasceris nobis

aut extendes iram tuam a generatione in generationem

₇Deus tu conversus vivificabis nos et plebs tua laetabitur in te

₈ostende nobis Domine misericordiam tuam

et salutare tuum da nobis

₉audiam quid loquatur ÷in me: Dominus Deus

quoniam loquetur pacem in plebem suam

et super sanctos suos et in eos qui convertuntur ad cor

₁₀verumtamen prope timentes eum salutare ipsius

ut inhabitet gloria in terra nostra

₁₁misericordia et veritas obviaverunt ÷sibi:

iustitia et pax osculatae sunt

₁₂veritas de terra orta est et iustitia de caelo prospexit

₁₃etenim Dominus dabit benignitatem

et terra nostra dabit fructum suum

₁₄iustitia ante eum ambulabit et ponet in via gressus suos