PSALMI IUXTA LXX 96

Dominus regnavit exultet terra laetentur insulae multae

₂nubes et caligo in circuitu eius

iustitia et iudicium correctio sedis eius

₃ignis ante ipsum praecedet

et inflammabit in circuitu inimicos eius

₄adluxerunt fulgora eius orbi terrae

vidit et commota est terra

₅montes sicut cera fluxerunt ※a facie Domini:

a facie Domini omnis terrae

₆adnuntiaverunt caeli iustitiam eius

et viderunt omnes populi gloriam eius

₇confundantur omnes qui adorant sculptilia

qui gloriantur in simulacris suis

adorate eum omnes angeli eius

₈audivit et laetata est Sion

et exultaverunt filiae Iudaeae

propter iudicia tua Domine

₉quoniam tu Dominus Altissimus super omnem terram

nimis superexaltatus es super omnes deos

₁₀qui diligitis Dominum odite malum

custodit animas sanctorum suorum

de manu peccatoris liberabit eos

₁₁lux orta est iusto et rectis corde laetitia

₁₂laetamini iusti in Domino

et confitemini memoriae sanctificationis eius