PSALMI IUXTA LXX 97

Cantate Domino canticum novum quoniam mirabilia fecit

salvavit sibi dextera eius

et brachium sanctum eius

₂notum fecit Dominus salutare suum

in conspectu gentium revelavit iustitiam suam

₃recordatus est misericordiae suae

et veritatem suam domui Israhel

viderunt omnes termini terrae salutare Dei nostri

₄iubilate Domino omnis terra cantate et exultate et psallite

₅psallite Domino in cithara in cithara et voce psalmi

₆in tubis ductilibus et voce tubae corneae

iubilate in conspectu regis Domini

₇moveatur mare et plenitudo eius

orbis terrarum et qui habitant in eo

₈flumina plaudent manu simul

montes exultabunt

₉a conspectu Domini

quoniam venit iudicare terram

iudicabit orbem terrarum in iustitia et populos in aequitate