₁post haec congregati sunt filii Moab

et filii Ammon et cum eis de Ammanitis

ad Iosaphat ut pugnarent contra eum

₂veneruntque nuntii et indicaverunt Iosaphat dicentes

venit contra te multitudo magna

de his locis quae trans mare sunt et de Syria

et ecce consistunt in Asasonthamar quae est Engaddi

₃Iosaphat autem timore perterritus

totum se contulit ad rogandum Dominum

et praedicavit ieiunium universo Iuda

₄congregatusque Iudas ad precandum

Dominum

sed et omnes de urbibus suis venerunt ad obsecrandum eum

₅cumque stetisset Iosaphat in medio coetu Iudae et

Hierusalem

in domo Domini ante atrium novum

₆ait

Domine Deus patrum nostrorum tu es Deus in caelo

et dominaris cunctis regnis gentium

in manu tua est fortitudo et potentia

nec quisquam tibi potest resistere

₇nonne tu Deus noster

interfecisti omnes habitatores terrae huius coram populo tuo Israhel

et dedisti eam semini Abraham amici tui in sempiternum

₈habitaveruntque in ea et extruxerunt in illa sanctuarium nomini tuo

dicentes

₉si inruerint super nos mala

gladius iudicii pestilentia et fames

stabimus coram domo hac in conspectu tuo

in qua invocatum est nomen tuum

et clamabimus ad te in tribulationibus nostris

et exaudies salvosque facies

₁₀nunc igitur ecce filii Ammon et Moab et mons Seir

per quos non concessisti Israheli

ut transirent quando egrediebantur de

Aegypto

sed declinaverunt ab eis et non interfecerunt illos

₁₁e contrario agunt et nituntur eicere nos de possessione

quam tradidisti nobis

₁₂Deus noster

ergo non iudicabis eos

in nobis quidem non tanta est fortitudo

ut possimus huic multitudini resistere quae inruit super nos

sed cum ignoremus quid agere debeamus

hoc solum habemus residui ut oculos nostros dirigamus ad te

₁₃omnis vero Iuda stabat coram Domino

cum parvulis et uxoribus et liberis suis

₁₄erat autem Hiazihel filius Zacchariae filii Banaiae filii Hiehihel

filii Mathaniae Levites de filiis Asaph

super quem factus est spiritus Domini in medio turbae

₁₅et ait

adtendite omnis Iuda et qui habitatis Hierusalem

et tu rex Iosaphat

haec dicit Dominus vobis

nolite timere nec paveatis hanc multitudinem

non est enim vestra pugna sed Dei

₁₆cras descendetis contra eos

ascensuri enim sunt per clivum nomine Sis

et invenietis illos in summitate torrentis

qui est contra solitudinem Hieruhel

₁₇non eritis vos qui dimicabitis

sed tantummodo confidenter state

et videbitis auxilium Domini super vos

o Iuda et Hierusalem nolite timere nec paveatis

cras egredimini contra eos et Dominus erit vobiscum

₁₈Iosaphat ergo et Iuda et omnes habitatores Hierusalem

ceciderunt proni in terram coram Domino et adoraverunt eum

₁₉porro Levitae de filiis Caath et de filiis Core

laudabant Dominum Deum Israhel voce magna in excelsum

₂₀cumque mane surrexissent egressi sunt per desertum Thecuae

profectisque eis stans Iosaphat in medio eorum dixit

audite me Iuda et omnes habitatores Hierusalem

credite in Domino Deo vestro et securi eritis

credite prophetis eius et cuncta evenient prospera

₂₁deditque consilium populo

et statuit cantores Domini ut laudarent eum in turmis suis

et antecederent exercitum ac voce consona dicerent

confitemini Domino quoniam in aeternum misericordia

eius

₂₂cumque coepissent laudes canere

vertit Dominus insidias eorum in semet ipsos

filiorum scilicet Ammon et Moab et montis Seir

qui egressi fuerant ut pugnarent contra Iudam

et percussi sunt

₂₃namque filii Ammon et Moab

consurrexerunt adversum habitatores montis Seir

ut interficerent et delerent eos

cumque hoc opere perpetrassent

etiam in semet ipsos versi mutuis concidere vulneribus

₂₄porro Iudas cum venisset ad speculam quae

respicit solitudinem

vidit procul omnem late regionem plenam cadaveribus

nec superesse quemquam qui necem potuisset evadere

₂₅venit ergo Iosaphat et omnis populus cum eo

ad detrahenda spolia mortuorum

inveneruntque inter cadavera variam supellectilem

vestes quoque et vasa pretiosissima et diripuerunt

ita ut omnia portare non possent

nec per tres dies spolia auferre pro praedae magnitudine

₂₆die autem quarto congregati sunt in valle Benedictionis

etenim quoniam ibi benedixerant Domino

vocaverunt locum illum vallis Benedictionis

usque in praesentem diem

₂₇reversusque est omnis vir Iuda et habitatores Hierusalem

et Iosaphat ante eos in Hierusalem cum laetitia magna

eo quod dedisset eis Dominus gaudium de inimicis suis

₂₈ingressique sunt Hierusalem

cum psalteriis et citharis et tubis in domum Domini

₂₉inruit autem pavor Domini super universa regna terrarum

cum audissent quod pugnasset Dominus contra inimicos Israhel

₃₀quievitque regnum Iosaphat

et praebuit ei Deus pacem per circuitum

₃₁regnavit igitur Iosaphat super Iudam

et erat triginta quinque annorum cum regnare coepisset

viginti autem et quinque annis regnavit in Hierusalem

nomen matris eius Azuba filia Selachi

₃₂et ambulavit in via patris sui Asa nec declinavit ab ea

faciens quae placita erant coram Domino

₃₃verumtamen excelsa non abstulit

et adhuc populus non direxerat cor suum ad Dominum Deum patrum suorum

₃₄reliqua autem gestorum Iosaphat priorum et novissimorum

scripta sunt in verbis Hieu filii Anani

quae digessit in libro regum Israhel

₃₅post haec iniit amicitias Iosaphat rex Iuda

cum Ochozia rege Israhel cuius opera fuerunt impiissima

₃₆et particeps fuit ut facerent naves quae irent in

Tharsis

feceruntque classem in Asiongaber

₃₇prophetavit autem Eliezer filius Dodoau de Maresa ad Iosaphat dicens

quia habuisti foedus cum Ochozia percussit Dominus opera tua

contritaeque sunt naves nec potuerunt ire in Tharsis