₁postquam vero cenaverunt introduxerunt iuvenem ad eam

₂recordatus itaque Tobias sermonem angeli

protulit de cassidile suo partem iecoris

posuitque eam super carbones vivos

₃tunc Rafahel angelus adprehendit daemonium

et religavit eum in deserto superioris Aegypti

₄tunc hortatus est virginem Tobias dixitque ei

Sarra exsurge deprecemus Deum

hodie et cras et secundum cras

quia istis tribus noctibus Deo iungimur

tertia autem transacta nocte in nostro erimus coniugio

₅filii quippe sanctorum sumus

et non possumus ita coniungi

sicut et gentes quae ignorant Deum

₆surgentes autem pariter

instanter orabant ambo ut sanitas daretur eis

₇dixitque Tobias Domine Deus patrum nostrorum

benedicant te caeli et terra et mare

fontes et flumina et omnis creatura tua quae in eis sunt

₈tu fecisti Adam de limo terrae dedistique ei adiutorium Evam

₉et nunc Domine tu scis

quia non luxuriae causa accipio sororem meam

sed sola posteritatis dilectione

in qua benedicatur nomen tuum in saecula saeculorum

₁₀dixit itaque Sarra

miserere nobis Domine miserere nobis

et consenescamus ambo pariter sani

₁₁et factum est circa pullorum cantum

accersiri iussit Raguhel servos suos

et abierunt pariter ut foderent sepulchrum

₁₂dicebat enim ne simili modo evenerit ei

quod et ceteris illis septem

qui sunt ingressi ad eam

₁₃cumque parassent fossam

reversus ad uxorem suam Raguhel dixit

₁₄mitte unam ex ancillis tuis et videat si mortuus est

ut sepeliam illum antequam inlucescat

₁₅at illa mittens unam ex ancillis suis

ingressa cubiculum

repperitque eos incolomes

secum pariter dormientes

₁₆reversa nuntiavit bonum nuntium

et benedixerunt Deum

Raguhel videlicet et Anna uxor eius

₁₇et dixerunt benedicimus te Domine Deus Israhel

quia non contigit nobis quemadmodum putabamus

₁₈fecisti enim nobiscum misericordiam tuam

et exclusisti a nobis inimicum persequentem nos

₁₉misertus es autem duobus unicis

fac eos Domine in plenius benedicere te

et sacrificium tibi laudis tuae et suae sanitatis offerre

ut cognoscat universitas gentium

quia tu es Deus solus in universa terra

₂₀statimque praecepit servis suis Raguhel

ut replerent fossam quam fecerant priusquam lucesceret

₂₁uxori autem suae dixit ut instrueret convivium

et praepararet omnia quae in cibos erant iter agentibus necessaria

₂₂duas quoque vaccas pingues et quattuor arietes occidi fecit

et parari epulas omnibus vicinis suis et cunctis amicis

₂₃et adiuravit Raguhel Tobiam ut duas ebdomadas moraretur apud eum

₂₄de omnibus autem quae possidebat Raguhel dimidiam partem dedit Tobiae

et fecit hanc scripturam

ut pars dimidia quae supererat post obitum eorum Tobis dominio deveniret