PSALMI IUXTA HEBR. 142

₁canticum David

Domine exaudi orationem meam

ausculta deprecationem meam in veritate tua

exaudi me in iustitia tua

₂et non venias ad iudicandum cum servo tuo

quia non iustificabitur in conspectu tuo omnis vivens

₃persecutus est enim inimicus animam meam

confregit in terra vitam meam

posuit me in tenebris quasi mortuos antiquos

₄et anxius fuit in me spiritus meus

in medio mei sollicitum fuit cor meum

₅recordabar dierum antiquorum meditabar omnia opera tua

facta manuum tuarum loquebar

₆expandi manus meas ad te

anima mea quasi terra sitiens ad te semper

₇cito exaudi me Domine defecit spiritus meus

ne abscondas faciem tuam a me

et conparabor descendentibus in lacum

₈fac me audire mane misericordiam tuam quoniam in te confido

notam fac mihi viam in qua ambulo

quoniam ad te levavi animam meam

₉libera me de inimicis meis Domine a te protectus sum

₁₀doce me ut faciam voluntatem tuam quia tu Deus meus

spiritus tuus bonus deducet me in terra recta

₁₁propter nomen tuum Domine vivificabis me

in iustitia tua educes de angustia animam meam

₁₂et in misericordia tua dissipabis inimicos meos

et perdes omnes ligantes animam meam

ego enim sum servus tuus