₁in diebus eius ascendit Nabuchodonosor rex Babylonis

et factus est ei Ioiachim servus tribus annis

et rursum rebellavit contra eum

₂inmisitque ei Dominus latrunculos Chaldeorum et latrunculos Syriae

latrunculos Moab et latrunculos filiorum Ammon

et inmisit eos in Iudam ut disperderent eum

iuxta verbum Domini quod locutus erat per servos

suos prophetas

₃factum est autem hoc per verbum Domini contra Iudam

ut auferret eum coram se

propter peccata Manasse universa quae fecit

₄et propter sanguinem innoxium quem effudit

et implevit Hierusalem cruore innocentium

et ob hanc rem noluit Dominus propitiari

₅reliqua autem sermonum Ioiachim et universa quae fecit

nonne haec scripta sunt in libro sermonum dierum regum Iuda

et dormivit Ioiachim cum patribus suis

₆regnavitque Ioiachin filius eius

pro eo

₇et ultra non addidit rex Aegypti ut egrederetur de terra sua

tulerat enim rex Babylonis a rivo Aegypti usque ad fluvium Eufraten

omnia quae fuerant regis Aegypti

₈decem et octo annorum erat Ioiachin

cum regnare coepisset

et tribus mensibus regnavit in Hierusalem

nomen matris eius Naestha filia Helnathan de Hierusalem

₉et fecit malum coram Domino

iuxta omnia quae fecerat pater eius

₁₀in tempore illo ascenderunt servi Nabuchodonosor regis Babylonis in

Hierusalem

et circumdata est urbs munitionibus

₁₁venitque Nabuchodonosor rex Babylonis ad civitatem

cum servi eius obpugnarent eam

₁₂egressusque est Ioiachin rex Iuda ad regem

Babylonis

ipse et mater eius et servi eius et principes eius et eunuchi eius

et suscepit eum rex Babylonis anno octavo regni sui

₁₃et protulit inde omnes thesauros domus Domini

et thesauros domus regiae

et concidit universa vasa aurea

quae fecerat Salomon rex Israhel in templo Domini iuxta verbum Domini

₁₄et transtulit omnem Hierusalem

et universos principes et omnes fortes exercitus decem milia in

captivitatem

et omnem artificem et clusorem

nihilque relictum est exceptis pauperibus populi terrae

₁₅transtulit quoque Ioiachin in Babylonem

et matrem regis et uxores regis

et eunuchos eius et iudices terrae

duxit in captivitatem de Hierusalem in Babylonem

₁₆et omnes viros robustos septem milia et artifices et clusores mille

omnes viros fortes et bellatores

duxitque eos rex Babylonis captivos in Babylonem

₁₇et constituit Matthaniam patruum eius pro eo

inposuitque nomen ei Sedeciam

₁₈vicesimum et primum annum aetatis habebat Sedecias

cum regnare coepisset

et undecim annis regnavit in Hierusalem

nomen matris eius erat Amithal filia Hieremiae de Lobna

₁₉et fecit malum coram Domino

iuxta omnia quae fecerat Ioiachim

₂₀irascebatur enim Dominus contra Hierusalem et contra Iudam

donec proiceret eos a facie sua

recessitque Sedecias a rege Babylonis