Κύριε, πέτρα μου καὶ ὀχύρωμά μου καὶ ἐξαιρούμενός με ἐμοί,

₃ὁ θεός μου φύλαξ ἔσται μου, πεποιθὼς ἔσομαι ἐπ᾽ αὐτῷ,

ὑπερασπιστής μου καὶ κέρας σωτηρίας μου,

ἀντιλήμπτωρ μου καὶ καταφυγή μου σωτηρίας μου,

ἐξ ἀδίκου σώσεις με.

₄αἰνετὸν ἐπικαλέσομαι κύριον

καὶ ἐκ τῶν ἐχθρῶν μου σωθήσομαι.

₅ὅτι περιέσχον με συντριμμοὶ θανάτου,

χείμαρροι ἀνομίας ἐθάμβησάν με·

₆ὠδῖνες θανάτου ἐκύκλωσάν με,

προέφθασάν με σκληρότητες θανάτου.

₇ἐν τῷ θλίβεσθαί με ἐπικαλέσομαι κύριον

καὶ πρὸς τὸν θεόν μου βοήσομαι·

καὶ ἐπακούσεται ἐκ ναοῦ αὐτοῦ φωνῆς μου,

καὶ ἡ κραυγή μου ἐν τοῖς ὠσὶν αὐτοῦ.

₈καὶ ἐταράχθη καὶ ἐσείσθη ἡ γῆ,

καὶ τὰ θεμέλια τοῦ οὐρανοῦ συνεταράχθησαν

καὶ ἐσπαράχθησαν, ὅτι ἐθυμώθη κύριος αὐτοῖς.

₉ἀνέβη καπνὸς ἐν τῇ ὀργῇ αὐτοῦ,

καὶ πῦρ ἐκ στόματος αὐτοῦ κατέδεται,

ἄνθρακες ἐξεκαύθησαν ἀπ᾽ αὐτοῦ.

₁₀καὶ ἔκλινεν οὐρανοὺς καὶ κατέβη,

καὶ γνόφος ὑποκάτω τῶν ποδῶν αὐτοῦ.

₁₁καὶ ἐπεκάθισεν ἐπὶ Χερουβιν καὶ ἐπετάσθη

καὶ ὤφθη ἐπὶ πτερύγων ἀνέμου.

₁₂καὶ ἔθετο σκότος ἀποκρυφὴν αὐτοῦ κύκλῳ αὐτοῦ,

ἡ σκηνὴ αὐτοῦ σκότος ὑδάτων·

ἐπάχυνεν ἐν νεφέλαις ἀέρος.

₁₃ἀπὸ τοῦ φέγγους ἐναντίον αὐτοῦ

ἐξεκαύθησαν ἄνθρακες πυρός.

₁₄ἐβρόντησεν ἐξ οὐρανοῦ κύριος,

καὶ ὁ ὕψιστος ἔδωκεν φωνὴν αὐτοῦ

₁₅καὶ ἀπέστειλεν βέλη καὶ ἐσκόρπισεν αὐτούς,

ἀστραπὴν καὶ ἐξέστησεν αὐτούς.

₁₆καὶ ὤφθησαν ἀφέσεις θαλάσσης,

καὶ ἀπεκαλύφθη θεμέλια τῆς οἰκουμένης

ἐν τῇ ἐπιτιμήσει κυρίου,

ἀπὸ πνοῆς πνεύματος θυμοῦ αὐτοῦ.

₁₇ἀπέστειλεν ἐξ ὕψους καὶ ἔλαβέν με,

εἵλκυσέν με ἐξ ὑδάτων πολλῶν·

₁₈ἐρρύσατό με ἐξ ἐχθρῶν μου ἰσχύος,

ἐκ τῶν μισούντων με, ὅτι ἐκραταιώθησαν ὑπὲρ ἐμέ.

₁₉προέφθασάν με ἐν ἡμέρᾳ θλίψεώς μου,

καὶ ἐγένετο κύριος ἐπιστήριγμά μου

₂₀καὶ ἐξήγαγέν με εἰς πλατυσμὸν

καὶ ἐξείλατό με, ὅτι εὐδόκησεν ἐν ἐμοί.

₂₁καὶ ἀνταπέδωκέν μοι κύριος κατὰ τὴν δικαιοσύνην μου,

κατὰ τὴν καθαριότητα τῶν χειρῶν μου ἀνταπέδωκέν μοι,

₂₂ὅτι ἐφύλαξα ὁδοὺς κυρίου

καὶ οὐκ ἠσέβησα ἀπὸ τοῦ θεοῦ μου,

₂₃ὅτι πάντα τὰ κρίματα αὐτοῦ κατεναντίον μου,

καὶ τὰ δικαιώματα αὐτοῦ, οὐκ ἀπέστην ἀπ᾽ αὐτῶν.

₂₄καὶ ἔσομαι ἄμωμος αὐτῷ

καὶ προφυλάξομαι ἀπὸ τῆς ἀνομίας μου.

₂₅καὶ ἀποδώσει μοι κύριος κατὰ τὴν δικαιοσύνην μου

καὶ κατὰ τὴν καθαριότητα τῶν χειρῶν μου ἐνώπιον τῶν ὀφθαλμῶν αὐτοῦ.

₂₆μετὰ ὁσίου ὁσιωθήσῃ

καὶ μετὰ ἀνδρὸς τελείου τελειωθήσῃ

₂₇καὶ μετὰ ἐκλεκτοῦ ἐκλεκτὸς ἔσῃ

καὶ μετὰ στρεβλοῦ στρεβλωθήσῃ.

₂₈καὶ τὸν λαὸν τὸν πτωχὸν σώσεις

καὶ ὀφθαλμοὺς ἐπὶ μετεώρων ταπεινώσεις.

₂₉ὅτι σὺ ὁ λύχνος μου, κύριε,

καὶ κύριος ἐκλάμψει μοι τὸ σκότος μου.

₃₀ὅτι ἐν σοὶ δραμοῦμαι μονόζωνος

καὶ ἐν τῷ θεῷ μου ὑπερβήσομαι τεῖχος.

₃₁ὁ ἰσχυρός, ἄμωμος ἡ ὁδὸς αὐτοῦ,

τὸ ῥῆμα κυρίου κραταιόν, πεπυρωμένον,

ὑπερασπιστής ἐστιν πᾶσιν τοῖς πεποιθόσιν ἐπ᾽ αὐτῷ.

₃₂τίς ἰσχυρὸς πλὴν κυρίου;

καὶ τίς κτίστης ἔσται πλὴν τοῦ θεοῦ ἡμῶν;

₃₃ὁ ἰσχυρὸς ὁ κραταιῶν με δυνάμει,

καὶ ἐξετίναξεν ἄμωμον τὴν ὁδόν μου·

₃₄τιθεὶς τοὺς πόδας μου ὡς ἐλάφων

καὶ ἐπὶ τὰ ὕψη ἱστῶν με·

₃₅διδάσκων χεῖράς μου εἰς πόλεμον

καὶ κατάξας τόξον χαλκοῦν ἐν βραχίονί μου.

₃₆καὶ ἔδωκάς μοι ὑπερασπισμὸν σωτηρίας μου,

καὶ ἡ ὑπακοή σου ἐπλήθυνέν με

₃₇εἰς πλατυσμὸν εἰς τὰ διαβήματά μου ὑποκάτω μου,

καὶ οὐκ ἐσαλεύθησαν τὰ σκέλη μου.

₃₈διώξω ἐχθρούς μου καὶ ἀφανιῶ αὐτοὺς

καὶ οὐκ ἀναστρέψω, ἕως συντελέσω αὐτούς·

₃₉καὶ θλάσω αὐτούς, καὶ οὐκ ἀναστήσονται

καὶ πεσοῦνται ὑπὸ τοὺς πόδας μου.

₄₀καὶ ἐνισχύσεις με δυνάμει εἰς πόλεμον,

κάμψεις τοὺς ἐπανιστανομένους μοι ὑποκάτω μου·

₄₁καὶ τοὺς ἐχθρούς μου ἔδωκάς μοι νῶτον,

τοὺς μισοῦντάς με, καὶ ἐθανάτωσας αὐτούς.

₄₂βοήσονται, καὶ οὐκ ἔστιν βοηθός,

πρὸς κύριον, καὶ οὐχ ὑπήκουσεν αὐτῶν.

₄₃καὶ ἐλέανα αὐτοὺς ὡς χοῦν γῆς,

ὡς πηλὸν ἐξόδων ἐλέπτυνα αὐτούς.

₄₄καὶ ῥύσῃ με ἐκ μάχης λαῶν,

φυλάξεις με εἰς κεφαλὴν ἐθνῶν·

λαός, ὃν οὐκ ἔγνων, ἐδούλευσάν μοι,

₄₅υἱοὶ ἀλλότριοι ἐψεύσαντό μοι,

εἰς ἀκοὴν ὠτίου ἤκουσάν μου·

₄₆υἱοὶ ἀλλότριοι ἀπορριφήσονται

καὶ σφαλοῦσιν ἐκ τῶν συγκλεισμῶν αὐτῶν.

₄₇ζῇ κύριος, καὶ εὐλογητὸς ὁ φύλαξ μου,

καὶ ὑψωθήσεται ὁ θεός μου, ὁ φύλαξ τῆς σωτηρίας μου.

₄₈ἰσχυρὸς κύριος ὁ διδοὺς ἐκδικήσεις ἐμοί,

παιδεύων λαοὺς ὑποκάτω μου

₄₉καὶ ἐξάγων με ἐξ ἐχθρῶν μου,

καὶ ἐκ τῶν ἐπεγειρομένων μοι ὑψώσεις με,

ἐξ ἀνδρὸς ἀδικημάτων ῥύσῃ με.

₅₀διὰ τοῦτο ἐξομολογήσομαί σοι, κύριε, ἐν τοῖς ἔθνεσιν

καὶ ἐν τῷ ὀνόματί σου ψαλῶ,

₅₁μεγαλύνων σωτηρίας βασιλέως αὐτοῦ

καὶ ποιῶν ἔλεος τῷ χριστῷ αὐτοῦ,

τῷ Δαυιδ καὶ τῷ σπέρματι αὐτοῦ ἕως αἰῶνος.