₁primo tempore adleviata est terra Zabulon et terra

Nepthalim

et novissimo adgravata est via maris trans Iordanem Galileae gentium

₂populus qui ambulabat in tenebris vidit lucem magnam

habitantibus in regione umbrae mortis lux orta est eis

₃multiplicasti gentem non magnificasti laetitiam

laetabuntur coram te sicut laetantur in messe

sicut exultant quando

dividunt spolia

₄iugum enim oneris eius et virgam umeri eius

et sceptrum exactoris eius superasti sicut in die Madian

₅quia omnis violenta praedatio cum tumultu

et vestimentum mixtum sanguine

erit in conbustionem et cibus ignis

₆parvulus enim natus est nobis filius datus est nobis

et factus est principatus super umerum eius

et vocabitur nomen eius Admirabilis consiliarius

Deus fortis Pater futuri saeculi Princeps pacis

₇multiplicabitur eius imperium et pacis non erit finis

super solium David et super regnum eius

ut confirmet illud et corroboret in iudicio et iustitia

amodo et usque in sempiternum

zelus Domini exercituum faciet hoc

₈verbum misit Dominus in Iacob et cecidit in Israhel

₉et sciet populus omnis Ephraim et habitantes Samariam

in superbia et magnitudine cordis dicentes

₁₀lateres ceciderunt sed quadris lapidibus aedificabimus

sycomoros succiderunt sed cedros inmutabimus

₁₁et elevabit Dominus hostes Rasin super eum

et inimicos eius in tumultum vertet

₁₂Syriam ab oriente et Philisthim ab occidente

et devorabunt Israhel toto ore

in omnibus his non est aversus furor eius

sed adhuc manus eius extenta

₁₃et populus non est reversus ad percutientem se

et Dominum exercituum non inquisierunt

₁₄et disperdet Dominus ab Israhel caput et caudam incurvantem et

refrenantem die una

₁₅longevus et honorabilis ipse est caput

et propheta docens mendacium ipse cauda est

₁₆et erunt qui beatificant populum istum seducentes

et qui beatificantur praecipitati

₁₇propter hoc super adulescentulis eius non laetabitur Dominus

et pupillorum eius et viduarum non miserebitur

quia omnis hypocrita est et nequam

et universum os locutum est stultitiam

in omnibus his non est aversus furor eius

sed adhuc manus eius extenta

₁₈succensa est enim quasi ignis impietas veprem et spinam vorabit

et succendetur in densitate saltus et convolvetur superbia fumi

₁₉in ira Domini exercituum conturbata est terra

et erit populus quasi esca ignis vir fratri suo non parcet

₂₀et declinabit ad dexteram et esuriet

et comedet ad sinistram et non saturabitur

unusquisque carnem brachii sui vorabit

Manasses Ephraim et Ephraim Manassen simul ipsi contra Iudam

₂₁in omnibus his non est aversus furor eius

sed adhuc manus eius extenta