₁et respondens Iob ait

₂vere scio quod ita sit

et quod non iustificetur homo conpositus Deo

₃si voluerit contendere cum eo

non poterit ei respondere unum pro mille

₄sapiens corde est et fortis robore

quis restitit ei et pacem habuit

₅qui transtulit montes et nescierunt hii quos subvertit in furore suo

₆qui commovet terram de loco suo et columnae eius concutiuntur

₇qui praecipit soli et non oritur

et stellas claudit quasi sub signaculo

₈qui extendit caelos solus et graditur super fluctus maris

₉qui facit Arcturum et Oriona et Hyadas et interiora austri

₁₀qui facit magna et inconprehensibilia

et mirabilia quorum non est numerus

₁₁si venerit ad me non videbo

si abierit non intellegam eum

₁₂si repente interroget quis respondebit ei

vel quis dicere potest cur facis

₁₃Deus cuius resistere irae nemo potest

et sub quo curvantur qui portant orbem

₁₄quantus ergo sum ego qui respondeam ei

et loquar verbis meis cum eo

₁₅qui etiam si habuero quippiam iustum non respondebo

sed meum iudicem deprecabor

₁₆et cum invocantem exaudierit me

non credo quod audierit vocem meam

₁₇in turbine enim conteret me

et multiplicabit vulnera mea etiam sine causa

₁₈non concedit requiescere spiritum meum

et implet me amaritudinibus

₁₉si fortitudo quaeritur robustissimus est

si aequitas iudicii nemo pro me audet testimonium

dicere

₂₀si iustificare me voluero os meum condemnabit me

si innocentem ostendere pravum me conprobabit

₂₁etiam si simplex fuero hoc ipsum ignorabit anima mea

et taedebit me vitae meae

₂₂unum est quod locutus sum

et innocentem et impium ipse consumit

₂₃si flagellat occidat semel et non de poenis innocentum rideat

₂₄terra data est in manu impii vultum iudicum eius operit

quod si non ille est quis ergo est

₂₅dies mei velociores fuerunt cursore

fugerunt et non viderunt bonum

₂₆pertransierunt quasi naves poma portantes

sicut aquila volans ad escam

₂₇cum dixero nequaquam ita loquar

commuto faciem meam et dolore torqueor

₂₈verebar omnia opera mea sciens quod non parceres delinquenti

₂₉si autem et sic impius sum quare frustra laboravi

₃₀si lotus fuero quasi aquis nivis

et fulserint velut mundissimae manus meae

₃₁tamen sordibus intingues me

et abominabuntur me vestimenta mea

₃₂neque enim viro qui similis mei est respondebo

nec qui mecum in iudicio ex aequo possit audiri

₃₃non est qui utrumque valeat arguere

et ponere manum suam in ambobus

₃₄auferat a me virgam suam et pavor eius non me terreat

₃₅loquar et non timebo eum

neque enim possum metuens respondere