₂Μέγας κύριος καὶ αἰνετὸς σφόδρα

ἐν πόλει τοῦ θεοῦ ἡμῶν, ὄρει ἁγίῳ αὐτοῦ,

₃εὖ ῥιζῶν ἀγαλλιάματι πάσης τῆς γῆς.

ὄρη Σιων, τὰ πλευρὰ τοῦ βορρᾶ,

ἡ πόλις τοῦ βασιλέως τοῦ μεγάλου,

₄ὁ θεὸς ἐν ταῖς βάρεσιν αὐτῆς γινώσκεται,

ὅταν ἀντιλαμβάνηται αὐτῆς.

₅ὅτι ἰδοὺ οἱ βασιλεῖς συνήχθησαν,

ἤλθοσαν ἐπὶ τὸ αὐτό·

₆αὐτοὶ ἰδόντες οὕτως ἐθαύμασαν,

ἐταράχθησαν, ἐσαλεύθησαν,

₇τρόμος ἐπελάβετο αὐτῶν,

ἐκεῖ ὠδῖνες ὡς τικτούσης.

₈ἐν πνεύματι βιαίῳ συντρίψεις πλοῖα Θαρσις.

₉καθάπερ ἠκούσαμεν, οὕτως εἴδομεν

ἐν πόλει κυρίου τῶν δυνάμεων,

ἐν πόλει τοῦ θεοῦ ἡμῶν·

ὁ θεὸς ἐθεμελίωσεν αὐτὴν εἰς τὸν αἰῶνα.

διάψαλμα.

₁₀ὑπελάβομεν, ὁ θεός, τὸ ἔλεός σου

ἐν μέσῳ τοῦ ναοῦ σου.

₁₁κατὰ τὸ ὄνομά σου, ὁ θεός,

οὕτως καὶ ἡ αἴνεσίς σου ἐπὶ τὰ πέρατα τῆς γῆς·

δικαιοσύνης πλήρης ἡ δεξιά σου.

₁₂εὐφρανθήτω τὸ ὄρος Σιων,

ἀγαλλιάσθωσαν αἱ θυγατέρες τῆς Ιουδαίας

ἕνεκεν τῶν κριμάτων σου, κύριε.

₁₃κυκλώσατε Σιων καὶ περιλάβετε αὐτήν,

διηγήσασθε ἐν τοῖς πύργοις αὐτῆς,

₁₄θέσθε τὰς καρδίας ὑμῶν εἰς τὴν δύναμιν αὐτῆς

καὶ καταδιέλεσθε τὰς βάρεις αὐτῆς,

ὅπως ἂν διηγήσησθε εἰς γενεὰν ἑτέραν.

₁₅ὅτι οὗτός ἐστιν ὁ θεὸς ὁ θεὸς ἡμῶν

εἰς τὸν αἰῶνα καὶ εἰς τὸν αἰῶνα τοῦ αἰῶνος·

αὐτὸς ποιμανεῖ ἡμᾶς εἰς τοὺς αἰῶνας.