₂Ἐνώτισαι, ὁ θεός, τὴν προσευχὴν μου

καὶ μὴ ὑπερίδῃς τὴν δέησίν μου,

₃πρόσχες μοι καὶ εἰσάκουσόν μου.

ἐλυπήθην ἐν τῇ ἀδολεσχίᾳ μου καὶ ἐταράχθην

₄ἀπὸ φωνῆς ἐχθροῦ καὶ ἀπὸ θλίψεως ἁμαρτωλοῦ,

ὅτι ἐξέκλιναν ἐπ᾽ ἐμὲ ἀνομίαν

καὶ ἐν ὀργῇ ἐνεκότουν μοι.

₅ἡ καρδία μου ἐταράχθη ἐν ἐμοί,

καὶ δειλία θανάτου ἐπέπεσεν ἐπ᾽ ἐμέ·

₆φόβος καὶ τρόμος ἦλθεν ἐπ᾽ ἐμέ,

καὶ ἐκάλυψέν με σκότος.

₇καὶ εἶπα Τίς δώσει μοι πτέρυγας ὡσεὶ περιστερᾶς

καὶ πετασθήσομαι καὶ καταπαύσω;

₈ἰδοὺ ἐμάκρυνα φυγαδεύων

καὶ ηὐλίσθην ἐν τῇ ἐρήμῳ.

διάψαλμα.

₉προσεδεχόμην τὸν σῴζοντά με

ἀπὸ ὀλιγοψυχίας καὶ καταιγίδος.

₁₀καταπόντισον, κύριε, καὶ καταδίελε τὰς γλώσσας αὐτῶν,

ὅτι εἶδον ἀνομίαν καὶ ἀντιλογίαν ἐν τῇ πόλει.

₁₁ἡμέρας καὶ νυκτὸς κυκλώσει αὐτὴν ἐπὶ τὰ τείχη αὐτῆς,

ἀνομία καὶ κόπος ἐν μέσῳ αὐτῆς καὶ ἀδικία,

₁₂καὶ οὐκ ἐξέλιπεν ἐκ τῶν πλατειῶν αὐτῆς τόκος καὶ δόλος.

₁₃ὅτι εἰ ἐχθρὸς ὠνείδισέν με, ὑπήνεγκα ἄν,

καὶ εἰ ὁ μισῶν με ἐπ᾽ ἐμὲ ἐμεγαλορρημόνησεν, ἐκρύβην ἂν ἀπ᾽ αὐτοῦ.

₁₄σὺ δέ, ἄνθρωπε ἰσόψυχε,

ἡγεμών μου καὶ γνωστέ μου,

₁₅ὃς ἐπὶ τὸ αὐτό μοι ἐγλύκανας ἐδέσματα,

ἐν τῷ οἴκῳ τοῦ θεοῦ ἐπορεύθημεν ἐν ὁμονοίᾳ·

₁₆ἐλθέτω θάνατος ἐπ᾽ αὐτούς,

καὶ καταβήτωσαν εἰς ᾅδου ζῶντες,

ὅτι πονηρίαι ἐν ταῖς παροικίαις αὐτῶν ἐν μέσῳ αὐτῶν.

₁₇ἐγὼ δὲ πρὸς τὸν θεὸν ἐκέκραξα,

καὶ ὁ κύριος εἰσήκουσέν μου.

₁₈ἑσπέρας καὶ πρωὶ καὶ μεσημβρίας διηγήσομαι·

ἀπαγγελῶ, καὶ εἰσακούσεται τῆς φωνῆς μου.

₁₉λυτρώσεται ἐν εἰρήνῃ τὴν ψυχήν μου ἀπὸ τῶν ἐγγιζόντων μοι,

ὅτι ἐν πολλοῖς ἦσαν σὺν ἐμοί.

₂₀εἰσακούσεται ὁ θεὸς καὶ ταπεινώσει αὐτούς,

ὁ ὑπάρχων πρὸ τῶν αἰώνων.

διάψαλμα.

οὐ γάρ ἐστιν αὐτοῖς ἀντάλλαγμα,

καὶ οὐκ ἐφοβήθησαν τὸν θεόν.

₂₁ἐξέτεινεν τὴν χεῖρα αὐτοῦ ἐν τῷ ἀποδιδόναι·

ἐβεβήλωσαν τὴν διαθήκην αὐτοῦ.

₂₂διεμερίσθησαν ἀπὸ ὀργῆς τοῦ προσώπου αὐτοῦ,

καὶ ἤγγισεν ἡ καρδία αὐτοῦ·

ἡπαλύνθησαν οἱ λόγοι αὐτοῦ ὑπὲρ ἔλαιον,

καὶ αὐτοί εἰσιν βολίδες.

₂₃ἐπίρριψον ἐπὶ κύριον τὴν μέριμνάν σου, καὶ αὐτός σε διαθρέψει·

οὐ δώσει εἰς τὸν αἰῶνα σάλον τῷ δικαίῳ.

₂₄σὺ δέ, ὁ θεός, κατάξεις αὐτοὺς εἰς φρέαρ διαφθορᾶς·

ἄνδρες αἱμάτων καὶ δολιότητος

οὐ μὴ ἡμισεύσωσιν τὰς ἡμέρας αὐτῶν.

ἐγὼ δὲ ἐλπιῶ ἐπὶ σέ, κύριε.