Ἀλαλάξατε τῷ θεῷ, πᾶσα ἡ γῆ,

₂ψάλατε δὴ τῷ ὀνόματι αὐτοῦ,

δότε δόξαν αἰνέσει αὐτοῦ.

₃εἴπατε τῷ θεῷ Ὡς φοβερὰ τὰ ἔργα σου·

ἐν τῷ πλήθει τῆς δυνάμεώς σου ψεύσονταί σε οἱ ἐχθροί σου·

₄πᾶσα ἡ γῆ προσκυνησάτωσάν σοι καὶ ψαλάτωσάν σοι,

ψαλάτωσαν τῷ ὀνόματί σου.

διάψαλμα.

₅δεῦτε καὶ ἴδετε τὰ ἔργα τοῦ θεοῦ·

φοβερὸς ἐν βουλαῖς ὑπὲρ τοὺς υἱοὺς τῶν ἀνθρώπων,

₆ὁ μεταστρέφων τὴν θάλασσαν εἰς ξηράν,

ἐν ποταμῷ διελεύσονται ποδί.

ἐκεῖ εὐφρανθησόμεθα ἐπ᾽ αὐτῷ,

₇τῷ δεσπόζοντι ἐν τῇ δυναστείᾳ αὐτοῦ τοῦ αἰῶνος·

οἱ ὀφθαλμοὶ αὐτοῦ ἐπὶ τὰ ἔθνη ἐπιβλέπουσιν,

οἱ παραπικραίνοντες μὴ ὑψούσθωσαν ἐν ἑαυτοῖς.

διάψαλμα.

₈εὐλογεῖτε, ἔθνη, τὸν θεὸν ἡμῶν

καὶ ἀκουτίσασθε τὴν φωνὴν τῆς αἰνέσεως αὐτοῦ,

₉τοῦ θεμένου τὴν ψυχήν μου εἰς ζωὴν

καὶ μὴ δόντος εἰς σάλον τοὺς πόδας μου.

₁₀ὅτι ἐδοκίμασας ἡμᾶς, ὁ θεός,

ἐπύρωσας ἡμᾶς, ὡς πυροῦται τὸ ἀργύριον·

₁₁εἰσήγαγες ἡμᾶς εἰς τὴν παγίδα,

ἔθου θλίψεις ἐπὶ τὸν νῶτον ἡμῶν.

₁₂ἐπεβίβασας ἀνθρώπους ἐπὶ τὰς κεφαλὰς ἡμῶν,

διήλθομεν διὰ πυρὸς καὶ ὕδατος,

καὶ ἐξήγαγες ἡμᾶς εἰς ἀναψυχήν.

₁₃εἰσελεύσομαι εἰς τὸν οἶκόν σου ἐν ὁλοκαυτώμασιν,

ἀποδώσω σοι τὰς εὐχάς μου,

₁₄ἃς διέστειλεν τὰ χείλη μου

καὶ ἐλάλησεν τὸ στόμα μου ἐν τῇ θλίψει μου·

₁₅ὁλοκαυτώματα μεμυαλωμένα ἀνοίσω σοι

μετὰ θυμιάματος καὶ κριῶν,

ποιήσω σοι βόας μετὰ χιμάρων.

διάψαλμα.

₁₆δεῦτε ἀκούσατε καὶ διηγήσομαι,

πάντες οἱ φοβούμενοι τὸν θεόν,

ὅσα ἐποίησεν τῇ ψυχῇ μου.

₁₇πρὸς αὐτὸν τῷ στόματί μου ἐκέκραξα

καὶ ὕψωσα ὑπὸ τὴν γλῶσσάν μου

₁₈Ἀδικίαν εἰ ἐθεώρουν ἐν καρδίᾳ μου,

μὴ εἰσακουσάτω κύριος.

₁₉διὰ τοῦτο εἰσήκουσέν μου ὁ θεός,

προσέσχεν τῇ φωνῇ τῆς δεήσεώς μου.

₂₀εὐλογητὸς ὁ θεός, ὃς οὐκ ἀπέστησεν τὴν προσευχήν μου

καὶ τὸ ἔλεος αὐτοῦ ἀπ᾽ ἐμοῦ.