₂Σοὶ πρέπει ὕμνος, ὁ θεός, ἐν Σιων,

καὶ σοὶ ἀποδοθήσεται εὐχὴ ἐν Ιερουσαλημ.

₃εἰσάκουσον προσευχῆς μου·

πρὸς σὲ πᾶσα σὰρξ ἥξει.

₄λόγοι ἀνομιῶν ὑπερεδυνάμωσαν ἡμᾶς,

καὶ τὰς ἀσεβείας ἡμῶν σὺ ἱλάσῃ.

₅μακάριος ὃν ἐξελέξω καὶ προσελάβου·

κατασκηνώσει ἐν ταῖς αὐλαῖς σου.

πλησθησόμεθα ἐν τοῖς ἀγαθοῖς τοῦ οἴκου σου·

ἅγιος ὁ ναός σου, θαυμαστὸς ἐν δικαιοσύνῃ.

₆ἐπάκουσον ἡμῶν, ὁ θεὸς ὁ σωτὴρ ἡμῶν,

ἡ ἐλπὶς πάντων τῶν περάτων τῆς γῆς

καὶ ἐν θαλάσσῃ μακράν,

₇ἑτοιμάζων ὄρη ἐν τῇ ἰσχύι αὐτοῦ,

περιεζωσμένος ἐν δυναστείᾳ,

₈ὁ συνταράσσων τὸ κύτος τῆς θαλάσσης,

ἤχους κυμάτων αὐτῆς.

ταραχθήσονται τὰ ἔθνη,

₉καὶ φοβηθήσονται οἱ κατοικοῦντες τὰ πέρατα ἀπὸ τῶν σημείων σου·

ἐξόδους πρωίας καὶ ἑσπέρας τέρψεις.

₁₀ἐπεσκέψω τὴν γῆν καὶ ἐμέθυσας αὐτήν,

ἐπλήθυνας τοῦ πλουτίσαι αὐτήν·

ὁ ποταμὸς τοῦ θεοῦ ἐπληρώθη ὑδάτων·

ἡτοίμασας τὴν τροφὴν αὐτῶν, ὅτι οὕτως ἡ ἑτοιμασία σου.

₁₁τοὺς αὔλακας αὐτῆς μέθυσον,

πλήθυνον τὰ γενήματα αὐτῆς,

ἐν ταῖς σταγόσιν αὐτῆς εὐφρανθήσεται ἀνατέλλουσα.

₁₂εὐλογήσεις τὸν στέφανον τοῦ ἐνιαυτοῦ τῆς χρηστότητός σου,

καὶ τὰ πεδία σου πλησθήσονται πιότητος·

₁₃πιανθήσονται τὰ ὡραῖα τῆς ἐρήμου,

καὶ ἀγαλλίασιν οἱ βουνοὶ περιζώσονται.

₁₄ἐνεδύσαντο οἱ κριοὶ τῶν προβάτων,

καὶ αἱ κοιλάδες πληθυνοῦσι σῖτον·

κεκράξονται, καὶ γὰρ ὑμνήσουσιν.