Ἵνα τί ἀπώσω, ὁ θεός, εἰς τέλος,

ὠργίσθη ὁ θυμός σου ἐπὶ πρόβατα νομῆς σου;

₂μνήσθητι τῆς συναγωγῆς σου, ἧς ἐκτήσω ἀπ᾽ ἀρχῆς·

ἐλυτρώσω ῥάβδον κληρονομίας σου,

ὄρος Σιων τοῦτο, ὃ κατεσκήνωσας ἐν αὐτῷ.

₃ἔπαρον τὰς χεῖράς σου ἐπὶ τὰς ὑπερηφανίας αὐτῶν εἰς τέλος,

ὅσα ἐπονηρεύσατο ὁ ἐχθρὸς ἐν τοῖς ἁγίοις σου.

₄καὶ ἐνεκαυχήσαντο οἱ μισοῦντές σε ἐν μέσῳ τῆς ἑορτῆς σου,

ἔθεντο τὰ σημεῖα αὐτῶν σημεῖα καὶ οὐκ ἔγνωσαν.

₅ὡς εἰς τὴν εἴσοδον ὑπεράνω,

₆ὡς ἐν δρυμῷ ξύλων ἀξίναις ἐξέκοψαν τὰς θύρας αὐτῆς,

ἐπὶ τὸ αὐτὸ ἐν πελέκει καὶ λαξευτηρίῳ κατέρραξαν αὐτήν.

₇ἐνεπύρισαν ἐν πυρὶ τὸ ἁγιαστήριόν σου,

εἰς τὴν γῆν ἐβεβήλωσαν τὸ σκήνωμα τοῦ ὀνόματός σου.

₈εἶπαν ἐν τῇ καρδίᾳ αὐτῶν ἡ συγγένεια αὐτῶν ἐπὶ τὸ αὐτό

Δεῦτε καὶ κατακαύσωμεν πάσας τὰς ἑορτὰς τοῦ θεοῦ ἀπὸ τῆς γῆς.

₉τὰ σημεῖα ἡμῶν οὐκ εἴδομεν,

οὐκ ἔστιν ἔτι προφήτης, καὶ ἡμᾶς οὐ γνώσεται ἔτι.

₁₀ἕως πότε, ὁ θεός, ὀνειδιεῖ ὁ ἐχθρός,

παροξυνεῖ ὁ ὑπεναντίος τὸ ὄνομά σου εἰς τέλος;

₁₁ἵνα τί ἀποστρέφεις τὴν χεῖρά σου

καὶ τὴν δεξιάν σου ἐκ μέσου τοῦ κόλπου σου εἰς τέλος;

₁₂ὁ δὲ θεὸς βασιλεὺς ἡμῶν πρὸ αἰῶνος,

εἰργάσατο σωτηρίαν ἐν μέσῳ τῆς γῆς.

₁₃σὺ ἐκραταίωσας ἐν τῇ δυνάμει σου τὴν θάλασσαν,

σὺ συνέτριψας τὰς κεφαλὰς τῶν δρακόντων ἐπὶ τοῦ ὕδατος.

₁₄σὺ συνέθλασας τὰς κεφαλὰς τοῦ δράκοντος,

ἔδωκας αὐτὸν βρῶμα λαοῖς τοῖς Αἰθίοψιν.

₁₅σὺ διέρρηξας πηγὰς καὶ χειμάρρους,

σὺ ἐξήρανας ποταμοὺς Ηθαμ.

₁₆σή ἐστιν ἡ ἡμέρα, καὶ σή ἐστιν ἡ νύξ,

σὺ κατηρτίσω φαῦσιν καὶ ἥλιον.

₁₇σὺ ἐποίησας πάντα τὰ ὅρια τῆς γῆς·

θέρος καὶ ἔαρ, σὺ ἔπλασας αὐτά.

₁₈μνήσθητι ταύτης· ἐχθρὸς ὠνείδισεν τὸν κύριον,

καὶ λαὸς ἄφρων παρώξυνεν τὸ ὄνομά σου.

₁₉μὴ παραδῷς τοῖς θηρίοις ψυχὴν ἐξομολογουμένην σοι,

τῶν ψυχῶν τῶν πενήτων σου μὴ ἐπιλάθῃ εἰς τέλος.

₂₀ἐπίβλεψον εἰς τὴν διαθήκην σου,

ὅτι ἐπληρώθησαν οἱ ἐσκοτισμένοι τῆς γῆς οἴκων ἀνομιῶν.

₂₁μὴ ἀποστραφήτω τεταπεινωμένος κατῃσχυμμένος·

πτωχὸς καὶ πένης αἰνέσουσιν τὸ ὄνομά σου.

₂₂ἀνάστα, ὁ θεός, δίκασον τὴν δίκην σου·

μνήσθητι τῶν ὀνειδισμῶν σου τῶν ὑπὸ ἄφρονος ὅλην τὴν ἡμέραν.

₂₃μὴ ἐπιλάθῃ τῆς φωνῆς τῶν ἱκετῶν σου·

ἡ ὑπερηφανία τῶν μισούντων σε ἀνέβη διὰ παντὸς πρὸς σέ.